Iran khawchhak lama relin a kawng zawh suala a chetsualnaah mi 21 vel an thi a, mi dang tam takin hliam an tuar bawk niin sorkar chanchinbu chuan a tar lang.
Mi 348 phur rel hi Mashhad leh Yazd khawpui inkar, Tabas atanga km 50 vela hlaah a kawng hi a zawh sual a ni.
Railways deputy head chuan rel hian a kawng sir chiaha lo awm excavator a sut avangin chetsualna hi a tawk ta niin a sawi.
Emergency services chuan hliam tuar zinga thenkhat chu an nat deuh avangin thi zat hi an pun a hlauhawm hle niin an sawi.
Rel pindan 11 zinga panga chu a kawng atang hian an chhuak niin Iranian Red Crescent hotu, Mehdi Valipour chuan sorkar TV hnenah a sawi.
Tual chhung chanchinbuten online-a thlalak an thehdarhah chuan pindan eng emaw zat chu relkawng sirah an let a, an bulah excavator eng a let bawk.
National Rescue Service thupuangtu, Mojtaba Khaled chuan helicopter pathum leh ambulance 24 tirh nghal a nih thu leh chhiatna hi an ram sanaa Nilaini zing dar 5:30 (India rama zing dar 6:30) vela thleng a ni tih thuthar lakhawmtute hnenah a sawi.
Sorkar TV chuan tual chhung damdawi ina hliam tuar enkawl lai a tilang a. An zinga pakhat chuan an chuanna rel chu a tihdinna hmanga tihdin tum thut a ni a, tlan chak lo sawtin a kawng an zawh sual zui ta niin a sawi.
Tabas prosecutor chuan chetsualna thlen dan hi a chhui zui nghal a, excavator nena an insut theih dan hi hriat a tum.
Thuneitu pakhat chuan excavator hi relkawng chhia thawm thatnaa thawk ve pakhat a nih theih thu a sawi niin Associated Press news agency chuan a tar lang.