Aizawl: I&PR Minister Lalruatkima’n, “Central service-ah Mizo inziak tling zo kan awm ta meuh lo,” tiin, pawi a tih thu a sawi a. Zirlaiten tumruhna neia mahni state chauh ni lo, state dang thlenga rorel phaa awm tura tan an lak a tul thu a sawi.
Hermon School-in an zirlai tithate chawimawina Vanapa Hall, Aizawla an buatsaih a hmanpuinaah he thu hi Lalruatkima chuan nimin khan a sawi a. “State thenawmte chu central service leh central sorkara office pawimawhah kum tin an lut a, nakin lawkah kan state ngeiah pawh sorkar office-ah hotulian nihna an la rawn chelh fur thei dawn a, hnam ang pawhin tan lak a tul takzet,” a ti.
Lalruatkima chuan zirlaite leh thalaite chu thahnemngaihna leh rinawmna nen nung zel tura chahin, zirlai hlawhtlingte an kal zelna turah duhsakna a hlan a, hlawhtling ve ta rih lote pawh an tan hun tha a la inher chhuak dawn tih hriaa an hmaa awmte lehpel thei tur khawpa hun tha an la nei tih hriaa theihtawp chhuah turin a fuih bawk.