Grape an thar chhuah atanga wine zawrh leh hralh theihna tura Mizoram sorkarin dan a siamsak theihna turin Hnahlan leh Champhaia grape chingtuten eptu party-te punin, dan siamsak dodal lohna lehkha an lakhawm.
Eptu party-te hnen atanga dan siamsak dodal lohna lehkha an lakkhawm chhan zawhna chhangin, “Inhriatthiamna ringawt hnuaiah wine siam, hralh leh zawrh chhuah kalpui hi kan tan awmzia a awm tawh lo a. An duh hun hunah sorkar behchhanin tute emawin min mansak zel dawn. Kan duh ber chu wine siam theihna tura Mizoram sorkarin dan a siam hi a nih avangin, kan tih theih awmchhunah ngaiin eptu party-te pawhin an dodal lohzia lantira Mizoram sorkar dawr kan tum a ni,” tiin Hnahlan atanga thudawnnain The Zozam Times a hrilh.
Eptu party lehkhate keng chungin Hnahlan leh Champhaia grape chingtute hian hun remchang hmasa berah Chief Minister Zoramthanga dawr nawn an tum tih a sawi a. An indawrna azirin an hmalak dan tur an la rel leh tur thu a sawi.
“Hetianga eptu party-te ngei pawhin wine siamna dan siam a nih theih nana an dodal lohna lehkha min pek vek tawh chung pawha sorkarin a la siam duh lo a nih chuan kut hnathawktute min hmangaih miah loah kan ngai,” a ti a; Mizoram sorkar dinhmun an hriatthiam avangin na taka nawr hreh hle mah se, hetianga kan nawr chung pawha an la hlawhtling lo a nih chuan a chhe ber thleng pawha hmalak hi an huam thu a sawi bawk.