Pachhunga University College hnuaia ‘Certificate Course in Mizo Cultural Studies and Performing Arts’ zir chhuak mi 17-te hnenah vawiin khan certificate hlan an ni.
Course hi Mizo Department, Pachhunga University College leh Art & Culture Department tangkawpin an buatsaih a ni a, Mizoram University-in a pawmpui a ni bawk. Tun tumah hian zirlai 23 inziaklutin mi 17-in an zir chhuak a. Theory class hi Pachhunga University College zirtirtuten an zirtir a, hnam lâm leh zai chu Art & Culture department Instructor ten an zirtir thung.
Certificate hlanna inkhawm hi Department Lecture Hall-ah buatsaih niin Couse Coordinator, Dr. Lalnunpuia Renthleiin a kaihruai a, Pachhunga University College Principal Prof. H.Lalthanzara’n zirlaite hnenah hian certificate a hlan a, Art & Culture Department Deputy Director, Pu Lalchuailova chuan thu a sawi bawk.
He course hi kum 2017 khan bul tan a ni a, tun tum hi a batch lina a ni.