Aizawl West II bialtu, Minister Lalruatkima’n “Social media lamah te mi ṭhenkhatin kan ram chhe ta lutuk anga an ziak fo hi zirtirna dik tawklo a ni” a ti.
Aizawl West II MNF thalai huaihawt political training-ah nimin khan Lalruatkima chuan he thu hi a sawi a. Mizoramah thil ṭha tam tak a thleng mek a, a thleng zel bawk dawn nia sawiin, “Sorkar, kohhran leh mipuite hi kawng hrang hrangah kan ṭha em em a, insiamṭhatna tur thil ṭhenkhat erawh kan nei tlang tih erawh zep thu a awm lo” a ti.
MNF adviser ni bawk Lalruatkima chuan a hnam ang te, a sorkar angtea chhe ta vek ang hiala insawi fo chu a dik lo niin a sawi a. Sorkarin hripui leh thil dang avangin hun harsa a tawng tam hle tih sawiin, “Pu Zoramthanga sorkar, hun harsaa ram hruai tlaka Pathianin a ruat hi hun lawmawmah pawh Pathianin he ram hruai tur hian a hungchhuak leh ngei ang tih ka ring” a ti.
Lalruatkima chuan “Pu Zoramthanga hruai sorkar hnuaiah hripuiin min ti khaihlak deuh mahse, hmasawnna hnathawh hmuh tur a tam em em a, kan kawngte pawh tunhma lakah chuan a lo ṭha ta hle a, ration buhfai leh gas kan hnianghnar a, nitin mamawh kan hnianghnar a, ramri humhalh thuah te sorkarin a thawk ṭha hle” a ti a. “He sorkar hian inthlan hmaa kan inzawrhna kan Manifesto kan tihlawhtling tam tawh em em bawk a ni,” a ti bawk.