Lawngtlai district-ah COVID19 vanga nu emaw, pa emaw chan naupang 6 awm tawhin, heng naupangte hi kum 3-17 inkar an ni a. An zinga chhawmdawl ngai naupang pahnih chuan kumin January atang khan Integrated child protection scheme (ICPS) atangin chhawmdawlna thla tin Rs. 2,000 an dawng.
Lawngtlai Addl. DC James Miahlung hova Lawngtlai district chhunga naupangte himna chungchang leh COVID19 vanga naupang harsatna tawkte chhawmdawl chungchang nimina sawihonaah sawi ho a ni. COVID19 vanga nu emaw, pa emaw chan naupang te chungchang hi report a ni a. Kum 2019 April atanga kum 2021 October ni 27 thlengin Lawngtlai district-ah naupang laka mipat hmeichhiatna lam hawia pawikhawihna (POCSO case) 30 a awm thu leh October 27, 2021 atanga June 9, 2022 thlengin POSCO case 6 ziahluh belh a nih thu report a ni bawk.
Addl. DC hova thutkhawmah hian District child protection unit (DCPU), ICDS District programme office leh BDO aiawhte bakah, District administration official-te leh DIPRO te an tel a. Lawngtlai district-a naupang himna atana hmalakna dinhmun te thlirhovin, hmachhawp hrang hrangte an sawiho bawk a ni.