Mizo Hindi Zirlai Pawl (MHZP)-in Sorkar sikulah primary atanga Hindi zirna kalpui a nih leh theihna tura chak taka hmalak a tul thu Education Minister Lalchhandama Ralte hnenah ziakin an thlen.
MHZP chuan “Private sikul ten primary atanga Hindi zirna an kalpui theih laiin, sorkar enkawl primary sikula Hindi zirna a kalpui thei lo hi pawi kan tiin, hriatthiam har kan ti hle” an ti a. Sorkar sikulah primary atanga Hindi zirna kalpui a nih leh theihna tura Hindi teacher post siam tura chak taka hma la turin sorkar chu an ngen thu an sawi.
Education minister chuan primary sikula Hindi zirtirtu dah leh tura central lama hmalak mek a nih thu leh relaxation chungchang pawh a theih ang anga enzui zel a nih thu a lo hrilh tih MHZP chuan sawiin, lawmawm a tih thu leh sorkar hmalaknate a hlawhtlin ngei an beisei thu an sawi.
MHZP chuan Union Home Minister Amit Shah-a’n hmarchhakah pawl 10 thlenga Hindi an zir tur thu leh, hei hi compulsory a nih tur thu a sawi chu ‘Hindi’ zirna chawisanna leh tihhmasawnna a nih rualin ram leh hnam inpumkhatna tha siam tur a nih dawn avangte, ram leh hnamin a mamawh tawh avang tein an thlawp tlat tih an sawi bawk.
CSS Hindi teacher atana lak zingah mahni post-a awm tha duh lo, aikal la lui an awm tih an hriat thu MHZP chuan sawiin, “Mahni hnaa tui lo, thawk tha leh duh lo an awm fo a nih chuan MHZP chuan a theih ang angin sorkar a thawhpui zel dawn a, sorkarin a lak chhan ang ngeia sikul naupangte hnenah rinawm taka zirtirna pe ngei turin CSS Hindi teacher zawng zawngte kan ngen a ni” an ti.
MHZP chuan “CSS Hindi teacher ban takte lak leh vek an nih tur thu 2018 MLA inthlan dawna MNF party auhla kha, tuna kan sorkar MNF ministry hian engtinnge a tih dawn tih hi MHZP chuan a thlir reng” an ti bawk.