PC party-in “Mizoram sorkarin sikul zawng zawng uniform inang vek hman tir tuma a hmalakna hi thil awmze nei lo, ram hmasawnna atana ṭangkaina nei miah lovah kan ngai” an ti a. Education kalphung siamṭhat hna tak tak thawk tura sorkar chu an duh thu an sawi.
Ram ṭhenkhat communist ram te, dictator-in ro an relna ramte leh sipai rorelna ramahte mipui tana harsatna nasa tak thlen zawnga thil inang hman a awm fo nia sawiin, PC party chuan “Hetiang hi mipui zalenna rahbehna leh ṭul miah lova mipui thunun tuma hmalakna, ram hmasawnna atana ṭangkaina pakhatmah nei chuang lo a ni” an ti a. Mipui ṭhatna tur ngaihtuah lo ram roreltu inti thu leh nunrawng (despotic ruler) awmna ram chhinchhiahna leh hriatna awlsam bera ngaih a nih thu an sawi.
PC party chuan “Sikul uniform inangtlang kan hmang a nih chuan hnamdang hmuhah Mizoram sorkar hmai a bal hle dawn” an ti a. “He thil hi ṭullo leh ṭha lo kan ti a ni” an ti.
“Kan ram hmasawnna tura kan education system siamṭhat dan tur kan nei fel vek tawh a. Mipuiin remchanna min siamsaka kan sorkar a nih chuan ramdang awh khawp education ṭha kan nei dawn a ni” PC Party chuan an ti bawk.