Mizoramah hmeichhe chunga hleilenna thubuai a pung zel a, December, 2019 laihawla hawn tan, All Women Police Station, Aizawl district-ah thubuai 149 ziahluh a ni tawh.
Hmeichhia hleilenna tuarte tlukluhna, hmeichhe hlang awmna, All Women Police Station hi December 13, 2019 ah hawn tan a ni a, hemi kum hian thubuai pali ziahluh a ni. Kum 2020-ah thubuai 56 ziahluh a ni a, a kumlehah thubuai ziahluh pungin 63 a tling chhova. Kuminah January atanga June 9 thlengin thubuai 26 ziahluh a ni tawh.
The Zozam Times zawhna chhangin All Women Police Station, Aizawl District hotute chuan thubuai an ziahluh zingah hur sualna laka naupang venhimna dan POCSO Act a tam ber thu sawiin, a dawtah hmeichhe zahawmna tihbawrhbanna thubuai a tam tih an sawi.
Nupa kara buaina chungchangah complaint an dawn hnem thu an sawi a, “An pasal ten an nupuite kut an thlak chungchang a tam chho zel,” an ti.
Thubuai an khawih zingah inngaizawng, a hmeichhia zawk kum a la tlin loh avanga an nu leh pa ten complaint an thehluh chungchangte pawh a awm thin thu police hotute chuan sawiin, danin kumtlinglo hmeichhiate a humhalh nasat avangin mipate pawh thubuai rip tak an awrh loh nana kum naupang tak ngaihzawn kawngah an fimkhur a tul thu an sawi.
All Women Police Station hotute chuan POCSO thubuai an ziahluhte chu tun hnaia thil thleng ni lo, kum hnih thum kalta vela pawikhawihna thleng, tun hnua an hriat chhuah hnua FIR thehluh takte a nih thu an sawi a, hmeichhe naupang kumtlinglo khuaikhemtua puhte chu an chhungkaw zing emaw, an laina hnai tak te emaw pawh an nih thin thu leh hemi kawngah hian fimkhur a tul thu an sawi bawk a ni.