I&PR Minister Lalruatkima’n Inrinni khan AMRUT scheme hnuaia kawngsira tuiluan kawr siam hnathawh meka a bial Aizawl West II huam chhunga hna te a enfiah a. Hemi ni vek hian zing lamah a bial Dawrpui Vengthara MLA fund hmanga hnathawhte a enfiah bawk.
Lalruatkima chuan a bial chhunga side drain siam hna chu nakin zela mipuiin an hman tur a nih avangin a siam dan phungah mipui tana tha tura zau zawka siam a tul thu a sawi a. Kanan venga tuiluankawr siam mekin kawngpui a nek nia sawiin, PWD hotute chu siamtha leh turin a ngen a. An siam mek chu a hna a that rualin nakin zela kawngpui hauh chu pawimawh a tih thu PWD hotute chu a hrilh.
Sorkar thuchhuahin a tarlan danin AMRUT scheme hnuaia khawpui tihhmasawnna tura kawngpui sira tuiluankawr siam mek chu package 3 a then niin, Rs. vbc 12.99 ruahman a ni a. Heng hnathawk tur hian contractor pathum – R. Lalhnuna, C. Lalhluna leh Lalsawmliana te thlan niin, package 1 bikah hna za-a 65 thawh tawh niin, package 2-ah za-a 55; package 3-ah za-a 90 thawh tawh a ni.
Lalruatkima chuan Dawrpui Vengthara MLA fund hmanga thil siam zawh tawh chin te chu a that thu a sawi a. “Hnathawktu ten veng chhung tan a ni tih hre chunga hlawkna ringawt rilrua dah lova mawi, tlo leh rintlaka an thawh a tul” a ti.
Hnathawh hmabak la awm te pawh sawisel kai lo tura thawh a tul thu Lalruatkima chuan sawiin, “MLA fund hmanga siam chu a senso zat te tarlan vek a nih thin avangin a sum sanction leh hna chu a inmil a tul” a ti a. Khawtlang mipuite pawhin hnathawh a that leh that loh an lo vilpui ve a duh thu sawiin, a hnua insawisel mai lova, khawtlang tan a ni tih hriaa tanho a tul thu a sawi bawk.