Mizoramah damdawi lama thawktute ngaihsamna avanga harsatna thlenna (medical negligence) tia sawi theih awm zauh zauh \hin mahse, hetiang buaina avanga an license tihtawpsak Mizo doctor an la awm lo.
Tunhmaa doctor leh mipui inkara harsatna thleng ngai lo chu tunhnuah a tam ta niin Indian Medical Association (IMA) Mizoram State branch hruaitu ten an sawi a. Medical negligence thleng \hin chungchanga The Zozam Times-in a kawmnaah IMA, Mizoram State branch hruaitute chuan Mizoramah damlo leh doctor inkarah harsatnate awm ve \hin mahse, ramdang nen khaikhin chuan a la nasa lo hle tih an sawi a, “Tunhma lama doctorte chunga thleng ngai lo leh damlote chunga thleng ngai lo, kan hriat ngai loh thil erawh a awm ta fo,” an ti.
IMA hruaitute chuan ‘medical negligence’ tia sawi theih chu thlen chang awm mahse, heng avanga Mizo doctor license tihtawpsak an la awm loh thu an sawi a, damlo leh doctor-te chungah thil duhawmlo zawk a thlen loh nan fimkhur tlan a \ul thu an sawi.
Damdawi ina inenkawl kawnga thil duhawmlo a thlen palh changin mipui leh doctorte chu a inep zawnga hmalak loh a \ha ber tih sawiin, “In mamawhtawn reng tur kan nih avangin a inep zawnga che lovin, invenpui zawk tur kan ni,” an ti.
IMA hruaitute chuan dam loh lai chu mihringte pangchan hun lai ber a nih avangin doctor-te pawh an dawhtheih a tul thu sawiin, “Doctor ten an damlote tan theihtawp an chhuah phawt chuan damlo ten doctor-te an tichhe ngai lo,” tiin, damlo ngaihsak kawngah Mizo doctor-te pawhin \an an lak thar a tul thu an sawi.
Doctor-in a thiam ang tawkin damlote chu a enkawl ngei tur a nih thu leh thlei bik neih a thian loh thu sawiin, damlovin amah enkawltu doctor laka lungawilohna a nei a nih chuan state medical council-ah a zualko thei tih an sawi a. Mipui ten an dikna chanvo an hmuh theihna tura hmalak kawngah an thanharh a tul thu an sawi.
IMA hruaitute chuan doctor-te chu mihring ve tho, tisual ve thei an nih thu sawiin, mipuite pawhin doctor-te an rawn dan leh kawng dangah pawh an tih tur chinte an hriat ve a tul thu an sawi a, “Doctor-te tan pawha buaipui hrehawm tur khawpa miharsa an awm fo \hin,” an ti.
Damdawi in-ah damlo leh a enkawltu lakah buaina a chhuahin a enkawltu lam mawhchhiatna a lian hle \hin tih IMA hruaitute chuan sawiin, “Medical negligence’ tih hi a ni reng em tih finfiah a ngai a, harsatna thlengah doctorte chu an lo inthlahdah reng tih kha chiang takin fiah a ngai,” tiin, buaina thleng \henkhatah chuan damlo zawk a thiam lo leh ti diklo zawk a nih chang a awm \hin tih an sawi.
Doctor \henkhatin an doctor-pui ten an lo enkawl tawh te an enkawl that duh loh thin chungchang zawhna chhangin IMA hruaitute chuan, medical ethics-ah chuan doctor-in a doctor-pui, a junior emaw, a senior emaw a sawisel thiang lo tih sawiin, “Doctor chuan kan hmelma pawh kan enkawl tur a ni,” an ti.
Eng thilah pawh buaina a thlena social media atanga infuihpawrh zawnga hma la thin an awm chu tha lo an tih thu an sawi a, “Mizote chu hnam tlem kan ni a, hmelma ena inen tham kan awm lo,” an ti. Damlo inenkawl kawnga harsatna thleng thinah pawh damdawi lam thiam leh mipui ten tan an lak tharna tur a awm ve ve thu an sawi
bawk.