Aizawl South I bialtu MLA C. Lalsawivunga’n a bial chhung Republic Pi Sumi lane-a MLA fund hmanga culvert siam chu Inrinni khan a hawng.
C. Lalsawivunga chuan culvert thar chu vengchhung inkalpawhna pawimawh a nih bakah Republic Veng leh Mission Veng inkalpawhna a nih thu a sawi a. “Kalphung tharah hian thil lawmawm tak kan hmu zel a, hnathawktu ten hlep leh a hlawkna beisei lovin mahni veng chhung leh ram hmangaihna thinlung nei chunga thahnemngai taka an thawk thin hi a lawmawm leh zual a ni” a ti.
Culvert siam thar na kawng chu lirthei lian luh theihna tura tichangtlung tura hmalak zel a tum thu C Lalsawivunga chuan a sawi a. “Kan nitin chetvelna zawng zawng hi politics vek a ni a, kan politics-ah hian Pathian lal ber sela, hna kan thawhnaah pawh politics chhia a lut ang tih hi ka hlau thin a, kan ram rorelnaah hian Pathian ram lo thleng se tih kan duh ber a ni” a ti bawk.
Republic venga culvert siam nan hian MLA fund Rs 18,90,000 sunction a ni a, Culvert siam theihna tur hian Kamlovi (L) tu leh fate, Hrangaia (L) tu leh fate, Lalngheta, Tlansanga, Ngursangliana leh Biakthanga te chhungkuain an ram an pe bawk a ni.
HSSLC-a zaa za pass vawi 8 nei tawh Tlungvel HSS-in pass an lawm
Tlungvel Higher Secondary School-in Inrinni khan HSSLC exam-a an zirlai exam zawng zawng an pass kim vek an lawm a. Bialtu MLA, Deputy Speaker ni bawk Er. Lalrinawma’n a telpui.
Er. Lalrinawma chuan, Tlungvel HSS thawktute leh zirlai hlawhtling thar zawng zawngte a lawmpui thu hrilhin, an kal zelna turah duhsakna a hlan a. Zirna pawmawh zia hriaa hma lam pan zel tura fuihin, nungchang uluk tur leh zirlai tih atana mawi leh mawilo thliarhrang thiam turte, tum mumal nei tur leh a ti hlawhtling tura bei sauh sauh turtein a fuih bawk.
Tlungvel Higher Secondary School hian HSSLC exam vawi 12 hmachhawn tawhin, 100% pass result vawi 8 an nei tawh a. Za-a za an pass loh kumah pawh za-a 90 aia sang pass result an la nei ziah a ni.