Congress party-in Chief Minister Zoramthanga chu Mizoram State Health Care Scheme (MSHCS) chungchanga thu diklo sawiah puhin, tun thla chhung ngeia thupha chawi turin an phut.
Aizawl Press Club-ah nimina thuthar thehdarhtute kawmin Congress party thupuangtu Dr Lallianchhunga chuan June 10-a Federation of Samagra Employee khawmpui, Vanapa Hall-a a hmanpuinaa chief minister-in ‘Mizoram State Health Care Scheme (MSHCS) atan Congress party-in kum 10 sorkarna an chan chhungin chengkhatmah an dah lova, kan awm loh chhungin chengkhatmah dah belh a awm lo,’ tia a sawi chu thu belhchiandawllo, dawt hmanga mipui bum tumna leh dawt thu hmanga Congress party tihmualpho tumna a nih thu a sawi.
Dr Lallianchhunga chuan Finance department-in RTI an chhanna a\anga a lan danin, MSHC sum bawmpui, Corpus Fund hi Congress sorkar lai, March 30, 2010-a dah \an a nih thu leh a tirah Rs. vaibelchhe 117.80 dah niin, dah belh zel a nih thu a sawi a. “Congress sorkar kum tawp, December, 2018 thleng khan Healthcare Corpus Fund-ah Rs. 1,55,56,71,000 a awm hman hial a ni,” a ti.
Congress thupuangtu chuan MNF sorkar laia healthcare atana an sum dah ve chu Rs. vaibelchhe 50 chiah a ni a, hei hi MNF Vice President a\anga an paihthlak tak, R. Tlanghmingthanga’n a fate hminga Bajaj Alliance-a a dah puntir kha a ni tih a sawi.
Thu chiang tak, document nen thlapa hmuh theiha awm reng laia chief minister-in dawt a sawi chu vanduaithlak an tih thu sawiin, “Politics-ah hian dawt sawi a thiang lova, chief minister phei chu dawt thu leh thu belhchiandawllo sawi mai mai tur an ni loh laiin Pu Zoramthanga erawh chuan dawt a ni tih a hriat chian em em pawh a thutak sawi hmiah zel hi a pawi a. Mizo pa \ha tak, biak nuam tak a nihna phena dawt sawi hreh miah lo a nihna hi Mizoramin a chhiatpui mek a ni,” Dr Lallianchhunga’n a ti.
Dr Lallianchhunga chuan Congress sorkar laiin damlo bill pek theih loh a awm ngai loh thu sawiin, MNF sorkar hnu kum thum emaw lek chhungin bill pek theih loh cheng nuai tam tak a inkhawlkhawm tawh niin a sawi a. “Kumin April thleng khan bill pek theih loh hi Rs. nuai 7,121 a tling tawh a. Damlo bill an pek theih loh avanga mipuiah ngaihdam dil mawlh mawlh tur an nih laia an chet chhiatna thup nana dawt an la sawi kual duh hi hriatthiam theih a ni lo,” tiin, chief minister chu thupha chawi tura an phut thu a sawi a. June thla chhunga thupha a chawi lo a nih chuan na taka hma an lak chhunzawm tur thu a sawi bawk.
Congress party hruaitute hian thuthar lakhawmtute an kawm zawh hian Chief minister Zoramthanga hnenah thupha chawi tura an phutna lehkha an pe a ni.