Champhai district Police, Excise leh Custom Preventive Force ten kumin chhunga heroin an man chu Kg 12 leh gram 260 a tling tawh a, tualchhung market-a Rs. nuai 282.90 man hu leh leh international market-a a hlut zawng Rs. nuai 6,130.25 hu nia chhut a ni.
Champhai District Level Narco Coordination Centre (NCORD) Committee chu an chairperson, District Magistrate James Lalrinchhana hovin nimin khan an thukhawm a, member Convener Champhai SP Lalrinpuia Varte chuan NCORD chu district tana thil thar,tunhnai maia sorkarin a din a ni tih a sawi a, kum 10 kalta chhunga damdawi tawlh man leh hmalaknate a sawi.
Champhai Police Addl. SP C. Lalengliana’n kumin chhunga Police, Excise & Narcotics Department leh Custom Preventive Force te ruihhlo man tawh zat a sawi danin June ni 13 thleng khan police ten heroin kg 6 leh gram 381, meth mum 10,000 an man a. Excise & Narcotic Department-in heroin kg 5 leh gram 128, meth mum 80,000 leh ganja kg 534 leh gram 500 man tawhin, Custom Preventive Force-in heroin gram 751 an man tawh bawk.
Meth an man tawh zawng zawng, mum 90,000 hlut zawng chu Rs. nuai 180 niin, Ganja kg 534 leh gram 500 an man chu Rs. nuai 16.03 hu nia chhut a ni.
He thutkhawma an tarlan danin, Champhaiah Drugs De-addiction & Rehabilitation Centre paruk awm mekin, enkawl lai mipa 284 leh hmeichhia 36, an vaiin mi 320 an awm mek.
NCORD Committee thutkhawmah hian zirlai, thalai, nu leh pa leh rual u zawkte thlenga huapzo zawka drugs awareness campaign neihte, thalaite ruihhlo laka an fihlim theihna tura hmalakna, Nasha Mukh Bharat Abhiyan nena thawhdunte an rel bakah ruihhlo tawlh tih tlem leh a kaihhnawiha man ten an phu tawk hremna an hmuh theih nana tanlak tulnate an sawiho bawk.