Public Health Engineering (PHE) department-in leilung zirchianna awm hmasa lo leh pawi nasa zawk a thlen theihte thlir hmasa lova lei chhung tui la tura lei verh hmun hrang hrangah a awm thin nia sawiin, “PHE department phalna la hmasa lovin leichhung tui te lakchhuah/verhchhuah leh hman phal a ni lo” an ti.
“The Mizoram water supplies (control) rules, 2006 rule 6-in PHE department chu tuihna hrang hrang – lei chhung leh pawna mi leh a chhehvelte humhalh, enkawl, vawnhim kawngah thuneitu a ni” an ti a. PHE department phalna la hmasa lova leichhung tui lakchhuah/verhchhuah leh hman phal a nih loh thu an sawi.
PHE Deptt. chuan lei chhung tui la tura lei verh te chu khawtlang mamawhna bakah zawrh sum atan leh mimal hman atana tih a ni thin nia sawiin, “Zirchiang hmasa lova lei verh chuan nghawng thalo leh pawi nasa tak a thlen thei a ni” an ti.
Lei tlakhniam chhan tam tak chu lei hnuai tui la chhuak tura verh vang niin PHE Deptt. chuan an sawi a. Lei chhung tui te chu lei hnuai thuk zawkah an inzawm vek avangin hmun thenkhata laih chhuah vak a nih chuan tuihna dang tuikhur, lui leh dil te a tlakhniam phah thei niin an sawi.
Lei chhung tui te inkhawlkhawm hman lo khawpa lakchhuah chuan tuihna dang a ti kangchat thei a, lak phak loh khawpa thukah a tlakhniam phah thin niin PHE Deptt. chuan an sawi a. Deptt-a mithiam ten hmun him tha nia an hriat hmunah chauh lei chhung tui lachhuak tura lei verh tur a nih thu an sawi bawk.