Mizote zínga páwl lian ber leh páwl ropui bera kan chhàl \hin YMA chuan a dincham, YMA Day vawi 87-na chu naktûk June 15, 2022 hian kan lo thleng leh dáwn ta reng mai a. Hlim taka hmang tùrin duhsakna kan inhlàn hmasa a ni e.
Hetia hlim taka hmang tùra kan induhsak rual hian YMA thiltum te, a dinchhante hre lo léka a phawvuak leh a heheu záwngin kan hmang ang tih erawh ka hlau hlel lo e! Kum 1935-a Zosap Pi Zaii hoa he páwl an din lai khán, Mizo \halaite hmakhua leh \hatna tùr thui tak dáwn chung leh Bible thu ang taka, ‘thil \ha ti atána siam kan nih’ ang taka he páwl hi, thil \ha ti tùrin an lo din a ni tih hi i hre reng ang u.
He ni ropui kan lawm tùrah hian eng ang rilru nge kan put dáwn, tih hi inzâwta inngaihtuah thar a \ûl khawpin ka hria. Lawm hut hut, tih hut hut lam ringawt kan ngaihtuah ngawt chuan a fel lo ang. |anpui ngai—mi rethei pachhia, hmeithai leh fahrahte \anpuia tuamhlãwm \hintu páwl a nihna te; Zonun Ze Mawi vawng nungtu a nihna te; Mizo nuna bet tlat, tlawmngaihna te chawi nungtu a nihnate; Kristian nun dàn \ha leh mawi nunpuia ngai sángtu a nihnate hi hre thar lehin chûng chuan YMA member-te rilru hi luah \heuh thei se la a duhawm hle ang.
Tin, YMA dinchhan pawh hi kan hriat tel a, a taka kan nun chhuahpui a \ûl hle mai. YMA Day hi ‘Hunawl hman \hat’ kan zir tharna leh a taka kan hman \anna ní ni thei se la. Thanpuii Pa (Pu J Malsawma) chuan, ‘Lèn mai mai te, tih mai mai te, sawi mai mai te, awm mai maite kan sim hma hi chuan Mizote hian kut kan dawn kumkhua dawn a nih hi,’ tiin a lo sawi (ziak) tawh a. Vawiinah hian YMA member, \halai rual zíngah hian ‘awm mai mai \hin’ hi inchhiar ta ila, mang ti ang khawpin kan tam lâwng maw? Awm mai mai, léng mai mai te hian hunawl an hman \hat a rinawm viau loh a ni. YMA member kan niha, ‘awm mai mai’ kan chìn tlat chuan, kan páwl dinchhan kan bawhchhia a, kan phatsan a ni tih i inhria ang u!
Zofate \hatna tùr ngaihtuah loa a ngaihtuahtute rèl lama dang nãl leh kaiza tha chak kan nih paw’n páwl member nih hi kan tlin lo a; inhnûkdâwk ngam tùr pawh kan ni tho bawk. Tin, Kristian nun dàn \ha hi YMA member te hian kan ngai sáng tak tak em, tih te pawh kan inzawh a \ûl hle.
YMA-a inhman hi a Kristian hle tih hi ka ngaih dàn rumrût a ni. Chanhaite leh riangvaite \anpui hi Isua Krista zirtirna nèn a inpersan lo mai ni loin a inhne rem thlap. Chutih rual chuan YMA-a inhmang tak, kohhran leh kohhran \halai páwl thiltihnaa lang duh miah lo pawh hi a YMA hlawl lo! Kristian nun dàn \ha ngai sángtu chuan kohhran belh tlata kohhran si renga awm hi a tih tùr (duty) dik tak a ni. Kawng lehlamin sawi ta ila, kohhrana inhmang tak, YMA thiltih leh hmalâkna hmu thlarau thei tlat lo, hmu khawvêl tlat pawh, Kristìan dàn dik leh Kristian nun dàn mawi a ni chuang hauh lo bawk.
Thil pakhat ka’n belh leh hrãm duh chu: YMA hi páwl a nih angin kum tin kan inthlang \hin. Hruaitu hlui chu hruaitu tharte an thlâk a \ùl cháng a awm fo. Hetih lai hian kum thar hruaitu inthlanna kan tlin tâk loh avànga hruaitu tharte hmalâkna thlawp tum tlat lo; YMA thiltihnaa hmél hmuh tùr awm ngai ta miah lo ang chi hi YMA Branch leh YMA group tin hian kan kawl ther fur lo maw? Inngaihtuah chian kan va’n ngai êm!
Tin, YMA hi páwl pakhat a ni a; hruaitute leh hruaitu nih tumte hian a chhúngah páwl páwl an siam hi a thiang lo! Political party ang maia inthlan dáwna nominee-ten páwl páwl kan lo siam a nih chuan hruaitu ni tlâkah inngai lul suh se! Zak hle zâwk rawh se! Kan hruaitu ni mékte leh hruaitu nih tumte hian, naktûk YMA Day-ah hian, hêngte hi ngaihtuah tel mawlh teh se.
YMA ti vula a pár zú chhùntír zêl tùr chuan YMA hruaitu mai ni lo, member tinte hian mawh kan phur \heuh mai. He páwl ropui tak zahawmna vawng nung zêl tùr chuan, YMA Day-ah tal hi chuan, páwl thil tum te, a dinchhante rilru-ah vawng tharin, a taka hmangtu nih i tum \heuh ang u.
YMA vul zêl rawh se!