MNF party-in Mizoram State Health Care Scheme (MSHCS) chungchanga Congress party ten Chief Minister dawt sawia an puhna chu a diklo niin an sawi a. “Chief Minister Zoramthanga’n Congress party kum 10 an sorkar chhungin MSHCS-ah chengkhatmah an dah lo nia a sawi chu dawt a ni lo” an ti.
Congress party chuan “June 10, 2022-a Vanapa hall-a Federation of Samagra Employee khawmpuia Chief Minister Zoramthanga’n Mizoram State Health Care Scheme atan Congress party kum 10 an sorkar chhunga chengkhatmah dah lo anga a sawi kha dawt chiang tak hmanga mipui bum tumna a ni” tiin, June 2022 chhung ngeia ngaihdam dil turin an phut a. MNF chuan Chief Minister thusawi chu dawt a ni lo niin an sawi ve thung a ni.
MNF party chuan Congress party thuchhuah chu thuchhuah hmang veka Health Care Scheme chi hnih – central sorkar scheme leh Mizoram sorkar scheme a awm thu sawiin, Mizoram sorkar scheme : Mizoram State Health Care Scheme (MSHCS) chu state dang ten state sponsor-a healthcare an kalpui ve hma April 2008-a MNF sorkarin bul a tan a nih thu an sawi a. A tirah state plan fund hnuaia Rs. vbc 50 dah a nih thu leh Central H&FW consultant-te rawtna anga open tender kaltlanga Reliance General Insurance Company Ltd te thawhpui an nih thu an sawi.
MSHCS kalpuina atan sum bawmpui (corpus fund) siamin, sorkar sum ei hek lova intodelh thei tura duan a nih thu MNF chuan an sawi a. Kum 2003-08 a MNF sorkarin kum 2007 tawplamah Asian Development Bank (ADB) hnuaia structural adjustment loan a dil a, Congress sorkar a pian hnu kum 2010 ah Rs. vbc 117 hmuh a nih thu leh hei hi loan condition (thu delh kilh) anga MSHCS corpus fund-a chhun ngei ngei tur, thil danga hman theih loh a nih thu an sawi.
Kum 2008 inthlana Congress sorkar thar lo piang chuan Reliance company-in bill pek chhuah loh an neih tam leh Plan fund atanga Rs. vbc 10 Bajaj Allianz (fortune plus)-a invest a nih chhuanlamin April 2009 – August 2010 thlengin MSHCS chu a kalpui ta lo niin MNF thuchhuah chuan a tarlang a. September 2011 atangin company hnuaia pawisa invest lovin Mizoram Health Care Scheme tiin bank hrang hrangah investment an ti a, a tira plan pawisa Rs. vbc 50 atanga Bajaj Allianz-a Rs. vbc 10 dah pung leh sum bawmpuia ami a pung (interest) te nen veka tlingkhawm Rs. vbc 155.56 chu kum hnih chhung hman a ni lo nia awiin, “Heng bak hi Congress kum 10 sorkar khan anmahni kutkawih leh state sum atangin Mizoram healthcare scheme-ah chengkhatmah an dah belh loh bakah health care hnuaiah natna khirh bik (critical illness) chauh bill theihin an ti a, Congress sorkar hunlaia Corpus fund an tih te pawh MNF sorkar hmalakna vek a ni zawk” an ti.
“December 2018-a MNF sorkar lo piang leh chuan Mizoram Health Care Scheme chu October 2019 atangin policy thar – natna zawng zawng bill theih turin a siam leh ta tih MNF chuan an sawi a. “SEDP atangin Rs. vbc 20 sanction nghal a ni a. Health Care Scheme intodelh nan kumtin sum bawmpuia Rs. vbc 50 dah belh zel tura ruahman a nih angin kum 2020-21 khan sum bawmpuiah Rs. vbc 50 dah leh nghal a ni” an ti bawl.