Co-ordination committee on management of Aizawl city (CoMaci) member ten SIPMIU ngenna bawhzuiin nimin khan Aizawl district Addl. DC R Vanrengpuia hovin Vaivakawn traffic point atanga Chanmari West panna kawng, Hunthar lei tlahniam inkara SIPMIU hnathawh tlawhin, tui pipe phum hna chawlhsan lailawk chhunzawm leh dan tur an sawiho.
Sorkar thuchhuahin a tarlan danin, Vaivakawn leh Hunthar inkara SIPMIU tui pipe phum hna hi kumin January ni ni 14 khan tanin, ni 99 chhunga zawh hman tura ruahman a ni a. Kumin May thla tira India President-in Aizawl a tlawh laia hna chawlhsan lailawk chu ruahsurin a tih khaihlak zui a, hna chhunzawm leh hun turah SIPMIU chuan CoMaci thu an ngaichang dawn niin SIPMIU Project Director Er. Lalrothanga’n a sawi.
SIPMIU tui pipe phum chu Aizawl chawmtu Aizawl Greater water supply scheme phase I (1988) leh phase II (2012) te chhawktu tur leh kum 2033-a Aizawl tui mamawh phuhru zo tura ruahman a ni a. SIPMIU Project Director-in a sawi danin, he project hi nitin tui litre maktaduai 37 pump thei tura ruahman niin, peihfel a nih hunah chuan Aizawl GWSS phase I &II nena belhkhawmin nitin mi pakhatin tui litre 135 an dawng thei dawn a ni.
Aizawl district Addl DC R. Vanrengpuia chuan SIPMIU project chhunzawm turin remchanlohna awma a lan loh thu sawiin, chhunzawm hun tur erawh chu la tihchian ngai a nih thu a sawi a. CoMaCi chu sorkarin kum 2019-a a din tawh ni mahse, hri leng avangin a nihna tur ang takin hna a la thawk lo nia sawiin, Aizawl khawpuia hmasawnna hnathawhte chu mipui tana harsatna siam lo thei ang bera kalpui tura khauh zawka thil kalpui a la ngai zel dawn niin a sawi bawk.
Coordinatioon committee on management of Aizawl city (CoMaCi)-ah hian AMC leh department pawimawh engemawzat aiawh te bakah local council leh BSNL aiawhte te an tel a. Aizawl khawpui hmasawnna ruhrel dinna tura department ten project hrang hrang an neihah te vantlang tana harsatna awm theite enpuia, hna kalpui dan turah ruahmannate siampui tura din niin, Aizawl Bawrhsap chu chairman a ni.