Power Grid corporation of India limited corporate social responsibility fund Rs. vbc 21 hmanga Serchhip District hospital building thar sakna hmun tur chungchangah nimin khan Serchhip Bawrhsap Nazuk Kumar hovin Bukpui lama sak duh NGO Co-ordination committee aiawhte leh a hmun ngaia sak tha zawka ngai Joint Action Committee aiawhte an inkawm.
Serchhip Bawrhsap chuan hospital building thar sakna hmun tur thlang tura thukhawm an nih loh thu sawiin, a sakna hmun tura ngaihdan inanglo awm mekah inhruipawhna boruak thalo awm lova sorkarin sak a duhna lam apianga tha taka sak a nih theihna tura boruak tha siam tura inkawmhona chu buatsaih a nih thu a sawi a. Mipuite pawh inhruipawhna thalo leh midangte rilru tina thei zawnga tawngkam nei lo turin a ngen bawk.
NGO Coordination committee hruaitute chuan sorkarin sak a duhna lam apiangah dodal lova an pawmpui theih thu an sawi a. Joint Action Committee lam pawhin sorkarin district hospital-in a mamawh thil dangte nen, felfai taka a sak theih dawn phawt chuan khawi hmunah pawh sa se sawiselna an neih loh thu an sawi ve bawk a ni.