HC Vanlalruata
Mi zawng zawngin dan (law) zirin dan hremi (ukil) kan ni vek thei lo tih chu kan hria a. Chutih lai chuan dan hriat loh hi dan bawhchhiat hnu a thiam channa atana thu tling lo a ni lawi si. Latin ţawngah chuan, ‘ignorantia juris non-excusat,’ tih thu hi a lar hle a, sap ţawng chuan ‘ignorance of the law is no excuse,’ tih mai a ni. Hei hi tunlai hun, social media-in min nasa taka min run tak hnu hian a pawimawh zual hle awm e.
Phone hmai hlai kan hum tak fur hnu social media hmang ţangkai a chanchinbumi (reporter) kan ni vek ta emaw ti a kan khawsak tak hnu hian dan bawhchhiatna leh dan bawhchhiatna nasa tak ni lem lo, mahse, mi rilru leh thinlung tihnat theihnate, awlsam taka mi tihmualpho theihna lama kuthleite kan pung ta thur thur a. Hei hi hria-in Parliament pawhin Information Technology lam leh internet kaltlang a media hman dik loh (cybercrime) hrem theihna atan dan a siam chho ta zel bawk.
Midangte tharum hmanga kutthlak (physical assault) kher lo pawhin ralkhat aţangin mi kan tina thei tawh a. An lakah pawi nasa tak kan khawih thei bawk. Hetiang lamah hian mi e-mail account leh facebook account khawih chingpensak (hack) a, sum leh pai inrawksaknate a thleng fo tawh a. Internet hmanga sum khawihchet (online banking) lo tibuai a sum inruksak (fraud) a tam em em tawh bawk. Hetiang kawngah hian Police leh bank thuneitute pawhin fimkhur turin mipui min ngen reng a, chuti chung chuan humsual dai an la awm reng tho a ni.
Hemi piahlamah hian hurherhna lam hawi a thla inlaksak a, intihmualpho a vauna (blackmail) hmanga sum tam tak inchhuhluihsakte a thleng fova, thla lak chauh ni lo, online a inbiakna tihtlangthan a invauna avanga sum inchhuhluisak a awm thei bawk a. Hei lo pawh hi pawikhawihna chi dang pawh a la awm awm e.
Social media hman dan hrim hrimah pawh hian mi rilru tihnatte, dawta inpuhnate bakah politics leh sakhua a inchemharna thleng hial thei zawngin mi ţhenkhat chuan fimkhur lo takin pawi an sawi a, dan an bawhchhe fo mai. Hetianga social media hmanga inhliam hi ţhenkhat chuan an ngawihpui mai mai laiin ţhenkhat chuan thubuai-ah an la a, an inkhing ta uaih uaih hlawm a nih hi.
Ţhenkhat lahin mitin hmuh theih turin lirthei chetsualna emaw tualthihna rapthlâk tak emaw an hmuhin mi zawng zawng hmuh tlak loh leh hmuh atana ţha lo, naupang tan phei chuan hmuh hauh loh tur thlalakte an thehdarh vak vak a. Tharum thawhna rapthlâk leh hmuh hrehawm tawpkháwk pawh an thawndarh chiam zel mai a. Chanchinbumi ni tura inzir si lo, daihriat tal pawh nei si lo khan he ‘media’ hi chem sei hriam tawn ang maiin an hmang a, mi pawi sawiin dan an bawhchhe mek a nih hi.
Tualthahna emaw, kut inthlakna emaw leh tharum thawhna dang dang bakah dan bawhchhiatna a awm emaw thil maksak leh ngaihnawm deuh tura an hriat chu mipui hmuh theih turin social media hmangin an thehdarh a. Chanchinbumite zawm tur leh tih loh tur (code of ethics) an hre lova, ethics bakah dan (law) pawh an bawhchhe fo mai. Ţhenkhat phei chuan zeldin thubawl nen, mipui mimir bengverh thil maksak hriat chakna leh mit virzia an hriat chian chu remchanga hmangin a maksak leh dangdai (sensational) thei ang berin an bawl phuan zui a, thudik leh thutak a tlem hle.
Online hmanga dan bawhchhiat bakah hian mi tam tak hi pawl hruaitu ţhenkhat hian a dik lo zawngin an thluak an suksak niin a lang ţhin a. A huhova thil an tih tawh chuan dan bawhchhe thei lo leh pawikhawih thei lo ang hialah an inngai a. Kan sorkar hrawnte lah hi a pa tillak an sawi ang mai a dan bawhchhetute an tam a pawl hminga a huhova an chet chuan hrem tura ke pen ngam lo an ni hlawm a. Chu chuan sual a tipunlun a, dan bawhchhiat chingte a tihuangtau a, mipui zalenna rahbehin a awm ţhin a nih hi.
Hei hi kan dinhmun diktak a nih avangin mi paurau leh pamham, an tam chhuanga min rahbeh tumte dolet tur hian dan kan hriat ve hi a ngai a ni. Sawi tawh angin mi zawng zawngin dan hi kan zir vek thei lova, dan zirmite leh ukilte pawhin an hre kim vek bik lo. Chutih laiin kan zalenna leh chanvo hre tur leh humhalh thei tur tal hi chuan kan mamawh ang zela dan kan hriat hi thil pawimawh tak a ni. Danin kan chanvo leh zalenna min pekte kan hriat chuan kan huaisen ang a, hria kan tam phei chuan he hnam hian nasa takin hma kan sawn tihna a ni ang.
A hmalama kan sawi tawh ang khan ţhenkhat chuan social media hi duh duh sawi theihna hmun emaw an ti a. Chutiang ngaihdan an neih rualin mi pawi sawi leh dan bawhchhiat awlsamzia an hre pha lo thung a, chu chuan dan a bawhchhiattir fo. Mi’n dawt hmanga midang an puhna emaw thilthleng tak tak ni dér si lo, thilthleng anga an ziah kha ţhenkhat chuan phŭr fahranin an lo thehdarh zung zung a. An chung a pik fo ţhin a nih hi.
Dan hriat loh hi chhuanlam tling a nih miau loh avangin kan invenna turte, kan zalenna leh chanvo rahbeh tumte laka kan himna tur leh chutiang tihchingte’n min vau zam lo satliah pawh ni lova, dikna rorelna an hmachhawn theihna tura che thei turin engemaw chen dan hi kan hriat a ngai a. Chutih rualin dan kan bawhchhiat lohna turin engemaw chen tal chu dan hriat I tum ţheuh ang u.