Rajya Sabha MP K Vanlalvena’n rel hmanga Mizoram tana buhfai chawkluhnaah railway lam chu an tih tur ti lova puhin, tihluihna hmanga FCI pawisa chhuhluiah a puh bawk.
Tunkar Thawhlehni khan Food Corporation of India (FCI)-in Mizoram tana buhfai a chawkluhna Bairabi rel station tlawhin, K Vanlalvena chuan rel platform leh FCI kudam inkar kawng chhia siamthat chu railway mawhphurhna a nih thu leh an siam hleihtheih loh thu a sawi a. He kawng chhia avang hian truck tam tak an kal duh lo nia sawiin, “Rel aṭanga buhfai lakchhuah nghal a nihloha rei tak a din chuan FCI-in pawisa an chawi belh zel a, railway lamin kawng chu siamṭha duh lovin tihluihna hmangin FCI pawisa an chhuhlui a ni” a ti.
He kawng siamṭha tur hian kum 2 vel kalta aṭang khan railway lam chu nawr an ni tawh tih Rajya Sabha MP chuan a sawi a. “Rel a lo thlenin bungrua te chu rang taka unload-a rel chu kir leh mai tur a ni a, hetiang hian kal thei ila chuan FCI pawisa chawi a tlem ang” tiin, bungrua unload zung zung theih a nih ṭhin loh avangin FCI-in a tlangpuiin thla khatah Rs. nuai 4 atanga nuai 5 vel an chawi thin thu leh Rs. nuai 9 chawi ṭum pawh an neih thu a sawi.
Rajya Sbha MP chuan bungraw hlanthlakna rel platform chu ruah leh nisa laka him tura a chung khuh ni se harsatna tam tak sutkian a nih a rin thu a sawi a. Heng harsatnate sukiang tur hian Delhi lama hmalak ngai chi a nih thu leh a ṭul anga bawhzui a tum thu a sawi bawk.
FCI aṭanga Mizoramin buhfai quota a dawn te chu khamkhawp a nih loh avangin mamawh phuhrukna tur a man tova lei a ngai thin tih pawh K Vanlalvena chuan sawiin, FCI buhfai te chu sorkar certified niin duhthusam ni mahse, bazar aiin a to zawk tih a sawi a. “Mizoramin thla tin matric ton nuai chuang kan mamawh a, heng zinga matric ton sing 5 vel chu kan quota pangngai, FCI aṭangin a tlawmin kan la thei. Kan quota bak FCI buhfai kan lak dawn chuan a man tovin kan lei ve a ngai a, chu ai chuan a man tlawm zawk bazar (open market) aṭangin Mizoram sorkarin a lei ṭhin,” a ti.
Kumin kumtir khan Mizoram buhfai mamawhna chu parliament session-ah sawichhuak mahse FCI-in dan an neih avangin quota hi tihpun ngawt theih loh nin K Vanlalvena chuan a sawi a. “Kan thusawi vang nge a nih ka hre lova, khata ṭang khan thla 4 chhung chu kan qouta bak hi matric ton 2500 vel, thlatin a man tlawmin kan dawng ta ziah,” a ti a. Mizoram chan tura relin buhfai a phurh te chu wagon 42 tur a nih laiin ṭumkhatah a zahve chauh an rawn phur thleng ṭhin niin a sawi bawk.
Rajya Sbha MP hian Bairabi Zophai-a IR sipai duty te pawh tlawh nghalin, harsatna leh mamawh an lo thlente chu a sutkian dan tur an sawiho nghal a, an chawhmeh man tur Rs. 3,000 a pe bawk a ni.