Kolasib district-a Steering committee on intensified diarrhoea control fortnight chu nimin khan Chief Medical Officer Dr Lalawmpuia Chhangte hovin an thukhawm a. Tun thla ni 23 atanga naupang kawthalo do beihpui kalpui chungchang an sawiho.
Chief Medical Officer chuan Kolasib district-ah naupang kum 5 chin hnuailam 9063 hnenah hriselna kawng inzirtirna leh kawthalo damdawi Oral Rehydration Solution (ORS) sem tura ruahman a nih thu a sawi a. Kawthalo chu natna hrik chi hrang hrang avanga awm thei a nih thu leh naupang hriselna a nghawng nat thin thu leh a hun taka damdawi nena enkawl a nih loh chuan nunna hlu tak chan theihna a nih thu a sawi.
Kawthalo chu ORS leh Zinc hmanga enkawl dam theih a nih thu CMO chuan sawiin, kawthalo laka mitin an him theih na turin taksa uluk, ei tur leh tui thianghlim a pawimawh thu a sawi a. Kawthalo laka himna tura invawn thianghlim kawnga zawm tur leh ORS hmanga enkawl dam theih a nih dan te inzirtirna chu District Hospital, Primary Health Centre leh Community Health Centre-ah te uar zawka kalpui tur a nih thu a sawi bawk.
SMO Dr. RK Lalthlamuana’n ‘Intensified Diarrhoea control fortnight’ kalpui chhungin Accredited Social Health Activist (ASHA) ten naupang kum 5 chin hnuailam hnenah zirtirna pein ORS packet 2 zelin an sem dawn tih a sawi a. PHC leh CHC tinah ORS-Zinc corner buatsaih a nih tur thu a sawi.