Meghalaya ram chhunga ruah sur nasa leh tuilian in National Highway a tih chhiat avanga tuialhthei lakluh a khaihlak palh theih avangin Food, Civil Supplies & Consumer Affairs (FCSCA) in Petrol leh Diesel hralh theih zat a bituk.
FCSCA Director Dr Andrew H Vanlaldika’n nimina hriattirna a tih chhuahah chuan Meghalaya ram chhunga Lumshnong-a tuilianin National Highway a tih chhiat avangin Mizorama tuialhtheih lakluh kawngah ni hnih/ ni thum vel a khaihlak palhthei tih tarlangin,”Hemi avang hian filling station ten mipuite hnenah an mamawh tawk bak a chuang liam pek chhuah loh tur a ni,” a ti.
Tuialhthei hi tum khatah scooty tan litre 3, motor cycle tan litre 5, LMV tan litre 10, MMV tan litre 20 leh HMV tan litre 40 lak theih a ni.
Filling station te’n Petrol leh Diesel an neih zat zing dar 9 leh tlai dar 4-ah FCSCA deputy director (G) emaw Supply POL report group Whatsapp ah hriattir thin tur a ni.
Filling station te’n tuialhthei an neih zat (dead stock te loin) petrol-ah litre 4000 leh diesel ah litre 7000 aia tlem an neih chuan FCSCA department hriatpuina tello chuan hralh chhuah tawh loh tur a ni.
He thupek hi Joint controller, legal metrology leh DCSO ten an bial chhungah khauh takin an kengkawh dawn a, dan lova POL zawh a awm leh awm loh an vil reng dawn a ni.