Tunhnaiah Mizoramah Covid-19 vei thar an pung leh tan a, Bukpui khuaah hri kai thar an tam chhoh zel avangin mipui punkhawmna lam khap rih a ni a, St Pauls Higher Secondary School, Aizawlah pawh zirlai thenkhatin hri an kai avangin fimkhur thilah sikul khar rih a ni bawk.
Tunhnaiah Kolasib District-a Bukpui khuaah Covid-19 a hluar chho mek a, hri inkaidarh zel tur ven nan Zirna in khar a ni a, inkhawm leh mipui puipunna dangte pawh khap rih a ni.
THE ZOZAM TIMES zawhna chhangin Bukpui khawtlang hruaitute chuan, June ni 9 atang khan an khuaah Covid-19 kai an awm tan thu an sawi a, hemi ni hian mi 9-in hri an kai tih hriat chhuah a nih thu an sawi.
Hemi hnuah hri kai thar hmuh belh zel a nih thu sawiin,”Covid-19 kai thar hi kan awm belh zel a, June ni 15 khan enkawl mi 40 an awm a, hei hi a tam ber ni a ni,” an ti a, Ningani tlai lamah erawh hri vei enkawl mek mi 20 vel an awm thu an sawi a ni.
An khuaah hri leng hluar chho mahse hri kai te erawhin an lak na lutuk lo tih an sawi a,”Hri kai mekte hi han la na tak an awm lo a, nikhat vel chu khawsik nasa an nei a, a tuka dam chho leh ta te an ni hlawm,” an ti.
Hri kai enkawlna a hranpaa an neih tawh loh thu an sawi a, hri kai tharte chu Doctor te vilna hnuaiah an in lamah an inenkawl zel thu an sawi.
Aizawl chhunga St Pauls Higher Secondary School-ah pawh zirlai thenkhat zingah Covid-19 kai an awm a, hemi avang hian tunkar atan Sikul an khar rih dawn.
St Pauls Higher Secondary School thuneitute’n THE ZOZAM TIMES an hrilh danin, an sikul naupang thenkhatin Covid-19 an kai avangin hri inkaidarhna a thlen loh nana hma la in, DEO te thurawn angin fimkhur thilah tunkar chhung chu sikul khar rih an rel tlu ta a ni.
An sikulah Covid-19 hri kai tam tak awm anga Social Media lama thuthang erawh thu dik lo a nih thu sikul thuneitute chuan an sawi bawk a ni.
Kumin April vel atangin Mizoramah hri leng a zia awm chho tan a, nikhata hri kai hmuh chhuah pawh a tlem chhoh zel laiin June thla tir atangin hri kai thar tam chho leh hret hret a ni.
Nilaini khan Mizoramah hri kai thar 19 hmuh chhuah thar leh a ni a, nimin tlai thlengin ram pumah enkawl lai mek mi 148 an awm a, hri avanga nunna chan erawh nimin lamah an awm belh rih lo a ni.