Rajya Shabha MP K. Vanlalvena’n nimin khan Zemabawka Mizoram State Cancer Institute a tlawh a. Damlote veivahna tur patient lift an la neih loh avangin dahsak a tum thu a sawi.
K Vanlalvena chuan “MP hmasa, Union Health Minister ni bawk Dr. C. Silvera’n Cancer hemna khawl Mizoramah min lo bunsak kha kan ram tana thil hlu tak leh chhuanawm a ni” tiin, “Khawl thil a nih avangin a lo hlui tawh a, a thlakna tur khawl tha zawk leh changkang zawk Mizoram sorkarin a bun thei hi hmasawnna ropui tak a ni” a ti.
Dr. Jeremy Lalrinsanga Pautu-in Mizoram chu cancer tamna a nih thu sawiin, sorkarin khawl tha tak a pe chu lawmawm an tih thu a sawi a. Pet-ctscan – taksa pum en theihna tur room pawh peihfel a ni tawh a, a khawl a pawh a thleng tep tawh nia sawiin, he khawl hmang hian taksa pum, chhungril lam thlengin cancer vei leh vei loh a en theih dawn tih a sawi bawk.
Sorkar thuchhuahin a tarlan danin Pet-ctscan hi Mizorama a awm loh avangin nitin deuhthaw phaiah mi za rual vel damlo an kal a tul phah a. He khawl hi hman theih a nih hunah chuan sum tam tak senga phai kal ngai lovin in entir theih tawh dawn a ni.