Mizoram Youth Commission (MYC) coaching centre pangana tur Champhai Nursing school building ami chu nimin khan MYC Chairman Dr Vanlaltanpuia’n a hawng.
MYC Chairman chuan Champhaia MYC coaching centre an hawng thei chu lawmawm a tih thu leh district mipuite a lawmpui thu a sawi a. MYC coaching centre chu Mizo hnam chhanna tura pawimawh tak zirna tihhmasawnna tura hawn a nih thu a sawi.
MYC hnuaia IAS full sponsorship leh Mega Hybrid IAS programme kalpuina turin sorkarin budget-ah Rs. vaibelchhe 2.6 a dah tih MYC chairman chuan a sawi a. Mizo thalaite India rama sang lak leh exam-ah te an tling thei ta meuh lo chu veiawm a tih thu sawiin, MYC-in super 40 programme kalpui tura hun a hawn mek thu leh India rama Academy tha ber ber – Vajiram and Ravi, Vision IAS leh ALS te nen an thawhho thu bakah June ni 24-a exam tura mi 500 chuang an inziakluh thu a sawi.
“Tun maiah a hlawhtlinna hmu lo mah ila a hlawhtlin ngei theih nan tan kan lak tlan a tul” MYC chairman chuan a ti a. Mega Hybrid IAS programme hnuaiah pawh mi 100 tan coaching centre 4 nen inremna siam a nih tawh thu a sawi bawk.
Sorkar thuchhuahin a tarlan danin Champhaia MYC coaching centre atan hian Nursing school building chhawng chung bera room pathum hman lailawk a ni dawn a, coordinator 1 lak tawh niin, faculty 3; General studies, English leh Mathematics zirtirtu lakna tur tender chhuah thuai tum ni.