Minister of State Robert Romawia Royte-in Covid19 avangin central sorkar atanga state sorkarin sum a hmuh thin ang leh centrally sponsored scheme leh central sector scheme atana sum hmuh thin te hmuh a nih loh avangin state sorkar a inrenchem a ngai niin a sawi.
Junior engineer service association of Mizoram (JESAM) general conference, DMC, Dawrpuia a hmanpuinaah Robert Romawia chuan nimin khan he thu hi a sawi a. Service association, welfare leh service hmasawnna (advancement) tam tak bawhzui hleihtheih a nih loh dan te hrethiam turin JESAM member te chu a ngen.
Robert Romawia chuan Mizoramin hmasawnna kawng a zawhnaah a langsar leh chawimawina dawng ni si lova a phena hlawhtlinna thlentirtu chu Junior Engineer te an nih thu a sawi a. Theihtawpa tan la a, mahni hna chelh lai tling tawk taka thawk tur leh hlawhtlinna chu kaisan (promotion) lama teh lova, an hnathawh result-ah hlawhtlinna puitling zawk a awm tih hmuthiam turin a chah.
Engineer te chu sorkara mawhphurhna pawimawh tak chelhtu, ram hmasawnna tura thiamna pawimawh bik neite an nih thu Robert Romawia chuan sawiin, ram changkang zawkte hmasawnna zira, Mizoram tana tangkai leh tha tur ngaihtuah kawngah rilru seng turin a chah a. Sorkarin hna (contract) a pek te inremsiamna (agreement) chungchang zirchianga, a thawktu (contractor) te nen hnathawh tan hmaa sawihova zirchian thin tul hlea a hriat thu leh chu chuan an hnathawhah rah tha tak a chhuah theih a rin thu a sawi bawk.