Gauhati High Court Judge Justice Marli Vankung-in nimin khan Champhai District Court tlawhin a endik a. Champhai Vengsang leh Dinthar venga District Court ram a tlawh bawk.
Champhai Judicial District Portfolio Judge ni bawk Marli Vankung chuan judiciary, executive leh force-te inkarah thawhhona tha a awm a tul thu sawiin, heng zinga pakhat pawh a chak loh chuan a pumin a chaklo dawn tih a sawi a. Inpawhtlang taka harsatna awmte sawihova a chinfel dan ngaihtuahho thin a tul thu a sawi.
Champhai judicial district-ah pawikhawihna thleng a tam avang leh pawikhawihna liantham tak tak a awm nual avangin chak zawka hmalaka chinfel a tul thu Marli Vankung chuan a sawi a. Jail dinhmun leh a chhunga awmte hriselna leh an dinhmunte ngaihven a tul thu a sawi bawk.
Justice Marli Vankung hian District Court hmunhma leh hnathawh dante, Juvenile justice board leh District legal services authority report te, hnathawktu neih dan, inbiakpawhna leh hmasawnna ruhrel siamte a endik a. Case neih dante leh chinfel a nih dante, chak zawka case chinfel a nih theihna tura hmalak tulte Judicial officer-te a sawipui bawk a ni.