Mizoram sorkar hnuaia School Education Department-in nimin khan hriattirna ti chhuakin, ruah sur nasa avanga Zirlai naupangte him zawk nan naktuk leh naktip (i.e 20 – 21.6.2022) chu Mizoram chhunga Primary School atanga Higher Secondary School zawng zawngah chawlh a puang.
Sikul chawlh puan hian mimal enkawl leh kohhran enkawl sikul zawng zawng pawh a huam vek a ni.
Education Department director Dr H. Lalthlangliana’n THE ZOZAM TIMES a hrilh danin, fur ruahtui hi ni 2 chhung a la tla nasa dawn nia khawchin hrilhlawktute’n an hrilh lawk avangin Disaster Management and Rehabilitation department-in thurawn a pek avangin ni hnih chhung sikul chawlh hi an puang ta tih a sawi.