ZPM Legislature party (ZLP)-in NHIDCL te’n Mizoram hmun hrang hranga kawng a siamna hnuhma leh leivungin mipuite leh environment tan harsatna a thlen nasa hle nia sawiin, hetianga harsatna a thlen chhan hi sorkarin a vilpui uluk loh vangah an puh.
Hemi chungchanga thuchhuah an siamah ZLP chuan, NHIDCL kawng siam mek chu Mizoram sorkarin a vilpui uluk loh avangin tui hna, lui tui, nungcha, thing leh mauin an tuar nasa a, chenna in chan hial pawh an awm phah tih an sawi a, hemi chungchang hi Mizoram mipui pawhin ngaimawhin, tunhnaiah pawl hrang hrangin an duh lohzia an auchhuahpui mek mah se Mizoram sorkar erawhin ngawih a chuh tlat tiin, sorkar ngawi reng mai chu an hrethiam lo tih an sawi.
ZLP chuan, ram hmasawnna hi a hlut rualin, hmasawnna hnathawhte chuan ram chhunga cheng mihring, nungcha, thing leh mau te tana harsatna a siam em tih leh ram leh hnam himna ti derthawng thei a ni em, tih ngaihtuah hmasak fo a tul tih sawiin,”Chutiangin, kawng laihna leivung paih pawh hi uluk a tul tulh tulh dawn,” an ti.
Kawng laihna leivungin environment a tihchhiat theihzia te, mihring leh nungcha, thing leh mau ten an tawrh nasat theihzia te hrereng chunga sorkarin a enpui a tul tih sawiin, rama hmasawnna hnathawhin ram leilung a tihchhiat loh dan tur ngaihtuahna nasa zawk sen a tul tak zet tawh tih ZLP thuchhuah chuan a sawi.
Mizoram sorkar-in July 29, 2020 khan NHAI, NHIDCL, NRRA, BRO, NABARD leh central sorkar agency dangten Mizorama kawng an laih endik/vilzui turin Roads and Infrastructure Development Board a din tih ZLP chuan sawiin, an chairman chu chief minister niin member 13 an awm tih an sawi.
Mizoramin tuna hun harsa a tawh mekah hian, sum tam tak senga din, he Board hian a tihtur dik tak a tih a tul tih sawiin,”Kawng siam avanga ram mipuite, leilung, thing leh mau leh nungchate bakah feh kawng, dil leh mi tam tak eizawnna atana harsatna nasa tak a thlen mek lai hian, awmze nei leh chak zawka hmala nghal turin kan phut,” an ti bawk.