Billie Elish chuan Glastonbury festival-a a inlanna hmang tangkaiin US Supreme Court-in mimal zalenna anga ngaih nau tihtlak phalna a titawp chu nasa takin a sawisel. Pawi a ti hle bawk.
Pyramid stage atangin, “Vawiin hi US-a hmeichhiate tan thiam thuah hnih thlenna Ni a ni,” tia sawiiin, “Sawi lovin ka awm thei lova, ka ngawi mai thei bik lo a ni,” tiin chhungril lam atang turna chu a dang zo lo, a ti a ni.
Kum upa lam (Supreme Court member te) te’n an nihna leh thuneihna an hmankhaw loh vangin tu te paw’n a nghawng tha lo an tuar, a ti bawk.
Supreme Court thlutlukna duh lova, dodal zingah lemchan leh rimawi khawvela milar tak tak an tam angreng hle a, tute’n emaw an taksa-a thuneih an tumna chu ram danpui kalh hialah ngaiin, an duhthlanna leh duhdan chu a lal ber tur a ni, tih thupui nena social media-a auchhuahpui an tam hle.
Hetih lai hian, nunna tihtawp leh nunna lak reng reng chu mihringte tih tur a ni lo, tia Supreme Court thutlukna ‘welcome’ a, thlawptu pawh an tam hle tho bawk a ni.
Anni hian nunna siam thei leh la theitu chu Pathian chauh a ni, tiin Conservative lam hawi te nen an thu a rual hle a, nunna petu phalna leh remtihna pawh lova, mahni thu-a nunna lo lak a, tihtawp ve ngawt chu thil tih lo leh sualna rapthlak tak a ni, tiin tan an khawh.
Hemi chungchangah hian thu inhmuh lohna leh inhnialna a tam chho tawlh tawlh dawn niin a lang a, nghawng pawh a nei na chho zel tura ngaih a ni bawk.
Zirtawpni kalta khan US Supreme Court chuan kum 50 zet an lo kalpui tawh rampumah hmeichhiate’n nau tihthlak theihna Dan leh zalenna an nei, tia Roe V Wade tia hriatlar an lo kalpui tawh chu a phet thla ta a.
An thutlukna siam avang hian US-a hmeichhia maktaduai tam takte chuan an duhthu ngeiin nau an titla thei tawh dawn lova, State tin te’n an mahni remchan dan angin an kalpui thung ang.
Hetih lai hian, Glastonbury chanchina zaithiam inlan naupang ber ni turin kum 20 mi Eilish hian record thar duhawm a siam.