Tun hnaia Lok Sabha bial thum leh state hrang hranga assembly bial pasariha bye-election neihte result chu Pathianni khan hriat a ni ta a. Punjab-ah rorel lai, Aam Aadmi Party chuan Punjab-a Sangrur Lok Sabha-ah hnehna an chang zo lo va. Uttar Pradesh-a bial hnih inthlanah rorel lai, BJP chuan hnehna an chang ve ve thung.
Uttar Pradesh-a Rampur leh Azamgarh bialah inthlan neih a ni bawk a. Assembly bial hi Tripura, Jharkhand, Andhra Pradesh leh Delhi-ah inthlan a ni bawk.
AAP chuan Delhi-a Rajinder Nagar bialah hnehna an chang a, he bial hi Rajya Sabha lama kal ta, Raghav Chadha-a hmun kalsan vanga awl a ni a. Hetih lai hian an rorelna, Punjab-a Lok Sabha inthlanah an chak lo thung.
Bhagwant Mann-a kaihhruai AAP sorkarnaah hian eptuten dan leh thupek kenkawh kawnga an sawisel nasat hle laiin Shiromani Akali Dal (Amritsar) president leh Khalistan thusawi thiam, Simranjit Singh Mann chuan Sangrur bialah Gurmail Singh chu a hneh a ni.
Tripura-a assembly bial li inthlana bial thumah rorel lai, BJP-in hnehna an chang a. Chief Minister Manik Saha chuan an khua, Town Bardowali bialah hnehna changin chief minister a nih chhunzawm thei.
Hetih lai hian Congress chuan Agartala bialah hnehna changin assembly house-ah kum tam tak hnuah member an nei veleh dawn ta a ni.
Jharkhand-ah Congress-in BJP an hneh a. Andhra Pradesh-ah Jagan Reddy-a kaihhruai YSRCP chuan Atmakar assembly bialah hnehna an chang bawk.
Uttar Pradesh-a Lok Sabha bial hnih inthlanah BJP-in hnehna an chang ve ve a. Azamgarh-ah BJP candidate Dinesh Lal Yadav Nirahua chuan Samajwadi Party candidate Dharmendra Yadav a hneh.
Rampur bialah BJP candidate Ghanshyam Lodhi chuan SP candidate Asim Raja chu vote 42,000 chuangin a hneh bawk.