April thla tir khan Aizawl District Police-ten khawpui chhungah rukruk a hluar thu an lo puang tawh a, rukrute chu man ve reng mah se ni tina thubuai an ziah luh tam ber a la ni ta reng.
January 1 atanga March 31, 2022 chhunga Aizawla police station palia thubuai ziah luh zinga zaa 69 chu ruk ruk case a ni a, hei hian police-te timangangin rukruk a hluar thu leh mipui fimkhur tura an ngen thu chu April 7, 2022 khan Aizawl District Superintendent of Police C Lalruaia leh police hotu dangin chanchinbumite hmaah an puang.
Aizawl SP chuan rukruk hi a hluar chho zel nia a lan thu leh June thla kal mekah pawh ni tina police station paliin case an ziah luh tam ber chu rukruk case a nih thu The Zozam Times a hrilh.
Police station hrang hrangin an thubuai dawn bawhzuiin rukru thinte chu ni tin man an neih ve reng thu a sawi a, “Rukruk a hluar kan ti a, thil ru thinte pawh zalen takin an awm reng lo a, police-te hian kan man ve nghal zung zung thin,” a ti.
Rukrukna thleng thinah hian mipuite fimkhur tawk loh avanga inrawkna thlengte pawh a awm thei tih sawiin, in kalh loa in chhuahsan leh motor chabi phawi loa kalsan maite a awm thin a, heng mi kawngah hian fimkhur tlan a tul thu a sawi.
C Lalruaia chuan rukruk kaihhnawiha an mante chu ruihhlo nena inkaihhnawih an ni deuh zel thu sawiin, “Aizawl chhungah hian ruihhlo ngawlvei hi an tam niin a lang a, heng mite hian an hmuh apiang an lak hreh loh avangin inven uluk a ngai hle,” a ti.
Kumin April 7-a chanchinbumite an kawm tum khan Aizawl SP chuan thil ruk lei chhawngtute chu IPC section 411-in a sawi anga man tel zel an ni tawh thu a lo sawi tawh a. Tun hnaia The Zozam Times-in a kawmnaah pawh thil rinhlelhawm tih hriat, a man pangngai aia tlawm fe-a ken tel document nei lo bungraw zawrh chu lei loh a him thu a sawi bawk.