Sorkar laipuiin sipai bângte chu sorkar hnaah an luh theihna tur zaa panga hauhsak a rem ti a, he an chanvo hi a taka tihhlawhtlin a nih theih nan sorkar karin kawng an lo zawh tawh a, chief minister hnenah memorandum pawh an lo theh lut tawh; mahse, Mizoram sorkar erawhin a tihlawhtling tha lo thung.
Sipai bângte chu sorkara Group ‘B’, ‘C’ leh ‘D’ hnaah zaa panga hauhsak an ni tih Mizoram Ex-Services League (MESL) hruaitute chuan The Zozam Times an hrilh a, he an chanvo hi a taka an chan theih nana hma la turin sorkarah ngenna an lo thlen tawh thin tih an sawi.
Congress sorkar lai, kum 2018, June 14 khan an thil phut tihhlawhtlinna phutin kawng an lo zawh tawh tih an sawi a, “MNF term kal lai mek hi a pian tirh, kum 2019 khan Chief Minister Pu Zoramthanga hnenah memorandum pawh kan lo theh lut tawh,” an ti.
Sorkara an thil phut hi tuna sorkar mek hian a tihlawhtling tha lo hle tih sawiin, “A hming chuan sorkarin notification chhuah ve mah se department hrang hrangin an zawm lo,” tiin an pawl pisaa lenchilhtu The Zozam Times an hrilh.
Tun hnaia Excise & Narcotics department-in hna a lakah sipai bâng pahnih lak tel a nih thu MESL hruaitute chuan an sawi a, hei hi tun sorkar kal meka sipai bângte zinga sorkar hnaa lak awmchhun an nih thu an sawi.
Police lakah pawh sipai bângte chu an chanvo anga luh ve nual an beisei thin tih an sawi a, police-a lut turin sipai bângte chu an that thu sawi bawkin, “Discipline hnuaia lo awm thang tawh, silai chelek dan pawh lo thiam tawh takte hi police-ah lak ni thin se an tangkai ngawt ang,” an ti.
MESL-ah sipai bâng 6,515 an awm mek a, chung zinga mi 1,000 bawrvel chu kum 45 hnuai lam, hna dang thawk theite an ni.
Sipaite hi a tlangpuiin kum 35-45 inkar an nih laiin services rules angin pension tlem pein chawlhtir thin an ni a. La valai tak siin hna thawh tur dang an zawn chawp a ngai thin a, MESL hian hna la thawk thei sipai bâng harsa tak takte an buaipui fo thin.
Hengte avang hian sorkar laipuiin sorkar hna lakah zaa panga hauhsakin state sorkar tihhlawhtlin tur a ni tih MESL hruaitute chuan sawiin, state sorkar erawhin hma a la chak ta lo niin an sawi a ni.