Siaha Addl. DC Donny Lalruatsanga’n NH-54 (Zero to Tipa) kawng laih hnathawh mek chu Inrinni khan tlawhin, leivung paih dan te a endik a. He hnathawk tu company hotu te leh he kawngin a paltlang khuaa khawtlang hruaitute a kawm.
Siaha Addl. DC chuan kawng laih hna kal mekin Mizoram hmun hrang hranga lui tui a tihbawlhhlawh nasat avanga NH-54 (Zero-Tipa inkara) kawng laihna leivung paih dan te pawh enfiah a nih thu a sawi a. Leivung chu duh duhna hmuna paih ngawt a thiang lo tih sawiin, a paihna tur hmun en fel hmasaka, hmun thlan bikah chauh, lui tui leh ngaw ti chhelo thei ang bera leivung chu paih tur a nih thu a sawi.
Kawng siamna leivung paih chungchang chu hnathawktu company hotute pawh sawipui an nih tawh thu Siaha Addl. DC chuan sawiin, company lamin leivung paih chungchangah thurel an zawm leh zawm loh chu district thuneitute atanga enfiah thin tur a nih thu a sawi bawk.
Kawng laih hna in thing phun a tihchhiatte pawh enin, company lam chu a theih ang anga kawngpui sira thingphun belh (afforestation) chung- changah hma la tura hriattir an ni a. Hmasawnna hna kal mek chu ngaw/lui/thing leh mau (environment) tichereu lo thei ang bera kalpui a pawimawh thu hrilhhriat an ni.
Siaha Addl. DC chuan kawng laih/ zauh hna thawh mek ah khaw chhungah hna thawh tan a nih tawh dawn avangin zangnadawmna dawng/la tawh te chu insawn chhuah a hun tawh thu hriattir hmasa tura kal an nih thu pawh a sawi a. Hemi chungchangah hian hriattirna pawh tihchhuah thuai a nih tur thu a sawi bawk.