Rukruk hluar zel tur ven hna thawh nghal a tul
Hri leng vanga hnathawh a khaihlak tak nual vang nge, sualnain bu a khuar nghet deuh deuh tih pawh hriat harsa khawpin rukruk a hluar a, police hotute sawi dan phei chuan kumin January atanga May thla inkar chhung ringawtah pawh police station hrang hranga thubuai ziahluh zaa 69 chu ruk ruk case a ni.
A bik takin Aizawl khawpui chhungah rukruk a hluar a, heng rukrute hi ngampa tak taka chet chingte pawh an awm mai bakah, man hlau lo niawm taka fimkhur tawk lote pawh an ni nawka sawi a ni. A tih reh dan kawng kan zawn thuai thuai loh chuan rukruk hluarna khawpui, khawpui ralmuang lovah kan chhuah thuai mai ang tih a hlauhawm hle.
Aizawl SP chuan rukruk kaihhnawiha an mante chu ruihhlo nena inkaihhnawih an ni deuh zel thu sawiin, “Aizawl chhungah hian ruihhlo ngawlvei hi an tam niin a lang a, heng mite hian an hmuh apiang an lak hreh loh avangin inven uluk a ngai hle,” a ti a, ruihhlo nghawng hi a lo tam thei dawn hle in a hriat bawk.
Rukruk hluar zel tur ven hi kan tih tur hmasa a ni a, mitin kan fimkhur a, ruihhlo kaihhnawiha inveng fimkhur chunga ke kan pen pawh a tul hle. Kan tu leh fate thleng pawha ram ralmuang leh zalen kan nih zel theih nan rukruk hluar zel tur ven hna hi thawk ila, tun atanga hma la nghal turin kan theihna zawn theuhah i chechhuak teh ang u.