Colombia ram lailia bawng kawlh insualna hmuna entute thutna chimah mi pali vel an thi a, mi dang 300 chuang zetin hliam an tuar bawk.
Tolima department-in El Espinal-a thil thleng video an tihchhuahah chuan thinga siam thutna chhawng thum, mipui thut khah vekna chu a chim a ni.
A chim hnuah hian bawng kawlh chu an chhaihna kual khung chhung (ring)-ah a la tlan kual zui reng a, mipuite chuan a bei ang tih hlauvin an tlanchhe nasa hle tih a hmuh theih.
An ram tih dana ‘corraleja’ an neihnaah hian vantlang zinga mi pawh eng emaw zat ring-ah hian bawng kawlh chhaihin an lut ve thin.
Thi zinga pahnih hi hmeichhia niin naupang pakhat leh mipa pakhat an tel bawk tih Tolima Governor Jose Ricardo Orozco chuan a sawi a. Damdawi in thuneitu pakhat chuan hliam tuar mi 322 an enkawl thu leh an zinga pali phei chu an nat deuh avangin intensive care-a an dah thu a sawi.
Pathiannia bawng kawlh chhaihna hi an rama kut lâr tak, San Pedro an tih lawmna chi khata an tih a ni.
President kal chhuak tur, Ivan Duque chuan thil thleng chu chhui a nih tur thu leh president-a thlan tlin tawh, Gustavo Petro chuan tual chhung thuneitute chu hetiang intihhlimna ang chi hi khap turin a ti bawk.
“Mayor-te chu hetiang mihring emaw, ran emaw pawh ni se, an thihna thlen theihna ang chi thil hi huaihawt phal tawh lo turin ka ngen a ni,” a ti.
Tun hi hetiang thila chhiatna a thlen vawi khatna pawh a nih loh thu Petro chuan a sawi bawk.
Inrinni pawh khan El Espinal-ah tho hian corraleja tihnaah mi eng emaw zatin hliam an lo tuar tawh a. Tun thla tirah khan Repelon khuaa corraleja neihnaah bawng kawlhin mi pakhat a si hlum tawh bawk.
Governor Orozco chuan an huam chhunga thuneitute chu corraleja khap tura hma an lak thu a sawi a, thil hlauhawm tak leh ran sawisakna chi khat a nih thu a sawi.
President thar tur, Petro-a hian an khawpui, Bogotá-a mayor a nih lai khan bullring lian bera bawng kawlh chhaiha infiamna a lo khap tawh a ni.