Tripura-a eptu, CPI-M kaihhruai, Left Front chuan an party miten rorel lai, BJP mite kut an tawrh leh beih an tawk fo thin nia an sawi chungchangah President Ram Nath Kovind leh Prime Minister Narendra Modi chu an hmu dawn.
Ram hruaitu lawk pahnih an hmuh tur thu hi chief minister hlui, CPI-M politburo member ni bawk, Manik Sarkar chuan nimin khan Agartala-ah a sawi.
Left Front chuan President Kovind leh Prime Minister Modi-a te chu Tripura Governor Ramesh Bais leh Chief Minister Biplab Kumar Deb ten an state-a eptu hruaitu leh anmahni thlawktute an beih thin tihtawp leh thunun an theih miau loh avangin an hmu dawn ta tih Sarkar chuan a sawi.
Sarkar chuan, “BJP kaihhruai Tripura sorkar leh home ministry changtu, Chief Minister Biplab Deb hian kan state chhunga buaina awm thin leh tharum thawhna thleng thin hi a thunun hlawhchham thak a ni,” a ti.
“Kan police-te hi rorel lai party ui te-ah an tang tawh a, dan bawhchhiate lakah engmah an ti thei lo,” tiin Sarkar hian a sawi bawk.
“CPI-M State Secretariat body chuan Chief Minister Biplab Deb hmuin kan party worker-ten state chhung hmun hrang hranga kut an tawrh hi kan hrilh a, a chet chhuah vat a tul thu kan thlen a. A hnuah Governor Ramesh Bais pawh hmu lehin dan leh thupek kenkawhna awmze awm lo chu kan thlen leh a. Governor hian buaina leh tharum thawhna thleng lo niin a hmu tlat a, engmah awlzia a awm lo a ni,” a ti.