Aizawl: Mizoram Larsap Hari Babu Kambhampati chuan Raj Bhavan-ah NABARD hotute a kawm a. Mizoram chhunga an hmalak mek dan a sawipui.
NABARD hotute hi Prasada Rao, GM, leh a thawhpuite chuan larsap hnenah Mizoram chhunga an hmalakna, sorkar bank leh mi mal nena an thawhhona bakah thil pawimawh hrang hrangte an thlen a. Larsap pawhin NABARD-in Mizoram hmasawnna tura an hmalakna kawng hrang hrangah lawmawm a tih thu a lo hrilh.
Larsap Kambhampati chuan NABARD hotute chu agriculture & allied section huanga an hmalaknate chu nasa zawka tan lakpui an ngai nia a hriat thu leh, a bikin sangha leh ar vulhtute tanpui kawngah nasa zawka luang chhuak turin a chah a ni.
NABARD hotute chuan kum 2021-2011 chhungin Mizoram Rural Bank leh Mizoram Coop. Apex Bank hnenah refinancing angin Rs.115 crore puktir an ni a. Hemi hun chhung tho hian state sorkar hnenah RIDF hnuaiah Rs.311 crore puktir an ni tawh a; sorkar a puktir tawh zat chu Rs.1,907 crore a ni mek a. Tunah hian he sum hmang hian project 495 thawh mek niin Rs 440 crore la sanction loh a awm mek a. He sum la pek chhuah loh sanction nan hian project thenkhatte chak zawka kalpui a ngai tih an tar lang.