Aizawl: MNF party Office Bearer te nimina thukhawm chuan resolution pass-in, Mizoram sorkarin ram humhalhna tura a hmalakna chu an thlawp tlat thu leh hripui leng avanga sum leh paia harsatna kara SEDP sem thei tura hma a la thei chu an chhuan thu an tar lang.
MNF resolution chuan Mizoram leh Assam ramri buai meka Zoramthanga kaihhruai sorkarin huaisen taka a hmachhawn dan chu tha an ti a, ramri chhehvela hmasawnna nasa tak a thlen mek chu ropui an tih thu leh ram humhalhna tura a hmalakna chu an thlawp tlat a, ramri buai ching fel tura sorkar hotuten inbiakna hmanga hma an lakna chu tha an tih thu an tar lang.
Covid-19 leng avanga khawvel pum puiin sum leh paia nasa taka harsatna a tawh laia MNF sorkarin mipui hnena SEDP sem thei tura hma a la thei chu lawmawm an tih thu sawiin, “Chhungkaw tam tak tan malsawmna leh eizawnna kawng siamsaktu a nih dawn avangin sorkar hmalakna hi kan chhuang takzet a, chhungkaw tam zawkin an dawn zel pawh kan duhsak hle,” an ti.
Mizoram sorkarin MNF leh India sorkar inremna thuthlung anga Bangladesh sorkar nen border trade hmanga insumdawn tawnna tura chak taka hma a la zel chu tha an tih thu leh ram tan mellung pawimawh tak a nih dawn avangin lawmawm an tih thu an resolution-ah chuan tar lang bawkin, heng bakah hian hri pui leng dona a tha leh zung, sum leh pai senga thawktu zawng zawng chungah lawmthu an sawi tih an tar lang bawk.
MNF party office bearer-te thutkhawma thuchah sawitu, MNF president Zoramthanga chuan MNF sorkar chu hun danga sorkar pangngai ang a ni lo va, an tum ber chu hripui leng karah dam khawchhuah a nih thu sawiin, sum leh pai dinhmunah - kum khat leh thla sawm atan budget-a an ziah luh central atanga lo kal lo chu Rs. vaibelchhe 3,000 vel a tling tih sawiin, hengte hi hmuh kim ni ta se harsatna awm lovin an kal thei ang tih a sawi.
OB thukhawm hi MNF Sr. Vice President Tawnluia’n a kaihruai a, hnam pasaltha martarte sun nan ngawi rengin minute khat chhung an ding a ni.