Vawk pul hri, African Swine Fever (ASF) leng thawh hnihna avanga Mizorama vawk thi chu 6,468 a tling tawh a, a tuar na ber, Champhai district chhungah vawk 3,114 a thi tawh.
Vawk pul hri leng nawn leh hi Champhai district atanga intanin February 4 atang khan ASF hri kai hi hmuchhuah leh tan a ni a, nimin thleng khan Champhai district-ah hian vawk 3,114 a thi tawh a, fimkhur thu-ah vawk 3,498 suat an ni tawh a; vawk thi leh fimkhur thua suat tawh zawng zawng belhkhawm zat chu 6,612 a tling tawh a ni.
Champhai district chhunga veng leh khua 29-te chu vawk hri lenna hmun, infected area-ah puan a ni a, veng leh khua paruk atanga sample lak result ngaihchan mek a ni a. ASF hri leng leh a leng ni ngeia rinhlelh hian district chhung khua leh veng 35-te a luhchilh mek a ni.
Mamit district chhungah pawh vawk pul hri leng chuan ziaawm lam pan lovin vawk thi a pung zel a, kumin chhungin ASF vangin vawk 1,389 a thi tawh.
Nimin khan Mizoram pumah ASF vawk 87 a thih belh leh a, fimkhur thilah vawk 88 suat a ni bawk a. Nimina vawk thih belhte nen kumin chhungin ASF vanga vawk thi zawng zawng chu 6,468 a tling tawh a, vawk suat pawh 5,410 a tling tawh bawk.