Aizawl : Govt. Aizawl North College Alumni Association, zirtirtute leh Students’ Union hruaitute’n an College Building chungchang leh an harsatna tawh hrang hrangte Deputy Chief Minister Tawnluia hnenah an thlen.
Aizawl North College hruaitute hian Deputy chief minister chu nimin khan a chenna inah len chilhin, hun engemaw chen atang khan an college building chungchangah buaina an lo thawh thin thu thlenin, an harsatna tawhte sut kianpui turin leh building hawh turte pawh zawnpui turin an ngen a ni.
Tawnluia chuan, Mizorama College awm mek te tih changtlun a pawimawh thu te, zirna in ngaih pawimawh a tul ziate sawiin, Aizawl North College-in an harsatna tawh mek zirlaite lenna khawp Classroom an neilo chu, theih ang anga ngaihtuahpui a tum thute North College hruaitute chu a hrilh.
Aizawl North College hruaitute hi Falkland Khawthlang hruaitute pawhin an tawiawm a, Falkland Vengah College hmun tur, sawrkar hmun thenkhat hawhtir theih dan awm thei se an duh thu Dy Chief Minister hnenah hian an thlen bawk a ni.