Kum 2001 hnua a vawikhatna atan Colorado Avalanche chuan khawvela ice hockey inelna lian leh ngaihhlut ber Stanley Cup an chawi a. Thawhtanni zing khan 2-1 in Tampa Bay Lightning chu Stanley Cup finals game 6-ah an hneh a, 4-2 in series an la.
Kumin Stanley Cup finals-ah hian a zawna vawi hnih champion lai Tampa Bay hi chak tura rinkai an ni a, tunhnaiah a zawna final vawi thum an luhna a ni a. National Hockey League a team tha an ni mek.
An khingpuite hi Arsenal neitupa Stan Kroenke hnuaia awm tho an ni a, kuminah beisei khum a chetha niin Playoffs-ah team tha an nihna an lantir.
Game 6 hi Tampa a Amalie Arena a khelh a ni a, Colorado khan goaltender Darcy Kuemper a rim hle a, save vawi 22 a siam a. Nathan MacKinnon chuan goal a khung bakah Artturi Lehkonen khung tur a siamsak ve leh bawk.
Avalanche ho defenseman Cale Makar chuan goal 8 leh assist 21 tun Playoffs-ah neiin Most Valuable Player lawmman Conn Smythe Trophy a dawng.
National Hockey League hi North America a kalpui niin United States atangin team 25 an tel a, Canada atangin team 7 telin team 32 inelna league a ni a. Regular season a che tha ten Playoffs khelin hei hi Stanley Cup Playoffs tih a ni thung.