Mizoram sorkarin dan loa gas, petrol leh diesel zawrh a khap a, hetihlai hian Assam tui lian avanga Mizorama tuialhthei vâng mek karah a black-in petrol zawrh awm rengin a man an chhiar to viau leh nghal a. Legal Metrology enforcement staff-ten dan bawhchhiate vai hna an thawk mek a, nimin pawh khan Aizawl khawpui chhungah dan loa petrol zawrhte an man.
Clause 4 of The Motor Spirit & High Speed Diesel of Supply, Petroleum Gas (Regulation of Supply & Distribution & Prevention of Malpractices) Order, 2005 hnuaia phalna neite tan chauh gas leh oil hi zawrh phal a ni a, chuti chung chuan phalna nei loa petrol zuar Aizawl khawpuiah thahnem tak an awm.
State thenawm - Meghalaya leh Assam-a ruah sur nasa avanga tui lian leh lei minin kawng a tihchhiat avanga Mizoramin tuialhtheiah harsatna a tawk mek karah Legal Metrology enforcement staff-te chuan tun hnaiah Aizawl khawpui chhungah dan loa petrol zuarte an vai thin.
June ni 24,2022 khan Legal Metrology enforcement staff te chuan Sairang Road Edenthar leh Hunthar vengah te dan loa petrol zuar vai a, hemi tum hian mi 3 hnen atangin Petrol litre 25 an man a ni.
Nimin khan Chanmari West, Chawlhhmun, Vaivakawn, Luangmual leh Zonuam vengah te dan loa petrol zuar an awm leh awm loh an zawng kual leh a, mi pathum hnen atangin petrol litre 28 an man leh bawk.
Dan loa petrol zuar an mante hi Aizawl district Bawrhsap/Magistrate hnenah an hlan tih Legal Metrology department hotute chuan The Zozam Times an hrilh a, dan loa thil titute chunga Action lak chu DC kutah a awm dawn tih an sawi.
Thla khat dawn chu Mizoramah tuialhthei lak luh a mumal tawh lo a, tun hnaia Silchar-a tui lian nasain a belhchhah leh bawk nen, petrol pump hrang hrangah duh thala lak tur a awm lohna a rei ta.
Heti chung hian Aizawl leh hmun dangah dan loa petrol zawrh tur erawh a awm reng thung a, tun kar chhoah phei chuan petrol litre khat chu Rs 400-a hralhte pawh an awm hial a ni.