British mipa tennis star Andy Murray chuan an rama khelh tennis Grand Slam ngaihhlut ber Wimbledon a first round a tlang ziahna record chu a chhunzawm a. Thawhtanni zanah Australian mi James Duckworth a hneh.
Murray hian Centre Court a inkhelah a tir atang tha takin khel nghal mai thei lo mahse tawnhriat a neih that zawk leh a theihna sang zawk chu inkhelah a lang a. 4-6 6-3 6-2 6-4 in hnehna a chang.
Kum 35 mi world number one hlui hi tunhnaiah a inhliamin a tibuai nasa hle a. A kawng hliam avanga tennis chawlhsan mai tura ngaih a nih hnuah kir lehin kumin Wimbledon khelh hma in a pum zawnah tihrawl hliam in a tibuai leh bawk.
World rankings a no. 52-na ni mekin an ramah erawh mipui tan a la hlawh a, boruak lian a la keng reng.
Second round-ah vawiin hian service na thei tak seeded number 20 John Isner nen an inkhel leh ang.
Vawi hnih Wimbledon champion ni tawh Murray chuan, “Entu mipui khat a Centre Court a inkhelh leh theih hi thil ropui nuam tak a ni.”
“Thil tam tak ka paltlang chhoh ve tak avangin helai hmunah hian ka la inkhel leh fo ang em tih a sawi theih tawh loh. Hei vang hian Centre Court-ah tunkarah ka inkhelh leh ngei beisei thei tura ka chak avangin ka lawm.” tiin Murray chuan a sawi.Covid vangin Berrettini
Kumin a SW19 a mipa inelna lama champion tura rin hlawh zing ami Italian Matteo Berrettini chu Covid 19 a kai tih hmuhchhuah a nih avangin a inhnukdawk.
Kum 26 mi seeded number 8 hi nikum final a Novak Djokovic hma a ding a ni a. Kuminah inbuatsaihna tournament a hman thin Queen’s Club Championship-ah a champion.
Tunhnaiah dam lohna avangin a inkhunghran hnuah hri a kai tih hmuhchhuah a ni a, qualifier a tling zo lo Elias Ymer chuan a thlak ang.