Kyrie Irving chuan NBA season thar atana Brooklyn Nets a kum khat contract a la neih theih chu hman a tum a, Dollar maktaduai 36.5 man hu kum khat la awm chu hman a thlang.
Brooklyn a beisei an chetthat loh avangin Irving hi chhuak mai thei a sawi a ni mek a. Tunhnaiah Nets hnenah hian ‘sign-and-trade’ a chhuahtir a nih chuan a kal duhna tur team te a hriattir.
Heng zingah hian Los Angeles Lakers chiahin an ngaihven a, inremna a awm theih loh avangin Irving hian a contract a la bang chu hman a thlang.
Kum 30 mi hi All-NBA selection-ah vawi thum lang tawhin All-Star vawi sarih a thlan a ni tawh bawk a. Nikum khan 27.4 points leh 5.8 assists average nei mahse Covid 19 vaccine a lak duh loh avangin an team awmna New York khawpui leh hmun thenkhatah a inkhel thei lova, game 29 chiah a khel.
Irving hi trade pangngai a la chhuak thei tho a ni a, Lakers pawhin an la ngaihven chhunzawm zel a. Los Angeles team-ah hian Russell Westbrook pawhin kum khat, Dollar maktaduai 47.1 man hman theih a neih chu a hmang dawn.
Westbrook-a hma hun hian sawi hlawh mahse contract a len avang leh a inkhelh dan avangin team dangin an ngaihven lova, coach thar Darvin Ham hnuaiah a contract a kum hnuhnung ber a hmang zo ngei dawn a ang sawt hle.