Chief Minister Zoramthanga’n Mizoram State health care scheme (MSHCS) bill ba rulhna tura Asian Development Bank (ADB)-a Rs vbc 1,000 an puk turah state sorkarin Rs vbc 280 chauh a rul dawn tih a sawi a, loan an puk chu a dawn hunah a rang thei ang berin pung awm turin bank-ah dah nghal an tum tih a sawi.
Nimin khan Mizoram Cooperative Apex Bank-in Vanapa Hall-ah Annual General Assembly vawi 27-na an hmang a, he hun a hmanpuinaah chief minister hian sorkarin ADB-a loan a puk tur sum dah pun a tum thu hi a sawi chhuak a ni.
Zorama chuan, “MSHCS bill ba rulhna tura ADB atanga loan kan puk tur Rs vbc 1,000 chu a taka kan dawn hunah Rs vbc 10 emaw, a za telin, a pung awm turin bank hrang hrangah a rang thei ang berin dah nghal kan tum,” a ti.
ADB loan rulh dan tur chungchang sawiin, India sorkarin Rs vbc 720 a rul dawn a, state sorkar rulh tur chu Rs vbc 280 a nih thu a sawi.
Zorama chuan, “A thlawna min rulhsak tur hi vbc 720 lai a nih avangin puk leh zelte pawh a chawkawm,” a ti a, sorkarin ADB atanga loan an puk tur sawiseltuten loan awmzia an hrechiang tawk lo tih a sawi bawk.
Apex Bank chu tha taka hna thawk, scheduled bank-ah pawh lut mai thei tura chhawpchhuah mek a ni thei chu lawmawm a tih thu Zorama chuan sawiin, mipui rawng an bawlnaah theihtawp chhuah zel turin a chah.
Khualzahawm, Cooperation Minister C. Lalrinsanga pawhin thu sawiin, cooperation movement pawimawhna leh a hlawhtlinna turin rinawmna leh taimakna a pawimawh thu a sawi a, inpekna tak tak nen kalpui a ngaih thu leh ‘mahniin hlawkna chang lo pawh ni ila mi dang chuan chang rawh se’ tih rilru put te, tanrualna leh nasa taka ram tan inpekna rilru put a pawimawh thu a sawi.
MCAB Annual General Assembly hi an chairman, T Lalmuanpuii’n a kaihruai a, CEO Lalzuahliana chuan report a pe a. An hruaitu zinga mi nunna chân ta sunna hun neih a ni bawk a, chawhnu lamah rorel inkhawm an nei a ni.
MCAB Ltd. hi kum 40-a upa a ni tawh a. Bank inrelbawlna hi Board of Directors kuta awm niin Board of Directors-ah hian member sawm (10) an awm a ni.
Bank branch 22 awmin CBS-a thlunzawm vek an ni a. Mizo tawnga hman theihna ATM 22 leh Mobile ATM Van pahnih an nei mek bawk a ni.