Thawhtan zana khelh tan Wimbledon 2022-ah Thawhleh zan khan ngaihven hlawh Rafael Nadal a inlan a, set khat hloh chungin a tlang a. Champion tura rinkai zinga mi Stefanos Tsitsipas pawhin hnehna a chang ve bawk. Hetihlai hian Canadian sixth seed Felix Auger-Aliassime ch first round paltlang zo lovin a tla ve thung.Nadal-an bul a tan tha
Hliam dam chiang hlei thei lo a neih vanga Tennis chawlhsan rilruk hman rum rum, Wimbledon 2002 ngei pawh a hmachhawn thei dawn em tih chiang lo reng Nadal chu ropuina ramah a leng leh mek a. Wimbledon-a a inlan hmasak berah mit la taka inlan nghalin a khingpui Francisco Cerundolo lakah harsatna lian tawk lovin hnehna a chang a, second round a lut.
Mipa lamah Grand Slam-a champion ngun ber Nadal leh Cerundolo te hian inhnehtawk takin bul an tan a, break pawimawh tak a neih chhawr tangkaiin Nadal-an set khatna a la. Set hnihnaah Nadal a khel tha lehzual a, break vawihnih neiin, game thum chiah a hloh a, set a la zui leh. Set thumnaah Cerundolo a khel tha ta viau thung a, game thum chiah hlohin set a la ve ta thung. Set linaah an inhnehtawk zui leh viau a. Game an inlak chhawk zak zak hnuin hun pawimawh takah Nadal a che fuh a, 5-4 a hma a hruai laiin beak a nei a, a serve hum zuiin set a la nawn leh a. 6-4 6-3 3-6 6-4 a hnehna changin second round a inhlangkai.
Grand Slam-ah vawi 22 ngawt champion tawh Nadal hian Calendar Slam puitlin tumin hma la a pan mek a. Australian Open leh French Open-ah a champion tawh a. Calendar Slam puitlin turin Wimbledon leh US Open-ah champion la ngai thung a, he inelna pahniha champion zawn erawh a har viauin a rinawm thung. Mahse, Nadal kha a ni miau a, tih theih loh tura ngaih a ni thei leh tlat maithei bawk.Tsitsipas a chak
Champion tura rinkai palina, Nadal-a final luhna tur dal thei tur ber pawla ngaih Stefanos Tsitsipas chuan Swiss qualifier Alexander Ritschard hmachhawnin bul a tan a. Greek tlangval hian set khat hloh bawk mahse second round a lut tho thung.
Tsitsipas leh Ritschard te hi rin phak bakin an inhnehtawk a, set khatnaah tie-break khelh a ngai nghal pang. Tie-break-ah tawnhriat nei tha zawk Tsitsipas a chungnung ta viau thung. Set hnihnaah Greek tlangval a khel tha leh zual a, game thum chiah hlohin set ala nawn leh. Set thumnaah an inhnehtawk zui leh viau a. Ritschard chuan break pawimawh tak a neih chhawr tangkaiin set a la ve thung. Set linaah Tsitsipas-an break a neih chhawr tangkiin set a la nawn leh thung a, 7-6 (7-1) 6-3 5-7 6-4 a hnehna changin second round a inhlangkai zui ta a ni.
Inkhel dangah kum 2021 semi-finalist Denis Shapovalov chu tlak hlauhawm takah a awm hman a. A khingpui Arthur Rinderknech lakah tha zeta er let in, a chak hram. Shapovalov hian awlsam taka set khatna a lak hnuin a talbuai chhungzawm a, set hnihna leh set thumnaah tie-break an khel ve ve a, hnufual zawkah tang ve vein set hnih a hloh zawn. Set linaah an inhnehtawk zui leh viau nanga break pawimawh tak a neih chhawr tangkaiin Shapovalov chuan set ala ve. Deciding set-ah tha zeta inlan in 6-1 6-7 (6-8) 6-7 (4-7) 6-4 6-1 in hnehna a chang zui ta a ni.
Player langsar tak tak ten hnehna an chan laiin Canadian sixth seed Felix Auger-Aliassime erawh chu first round paltlang zo lovin a tla ve thung. US Open semi-finalist American world number 45 Maxime Cressy a hmachhawn a, inkhel hmuhnawm takah 7-6 (7-5) 4-6 7-6 (11-9) 7-6 (7-5) in vanduai zawkah a tang a, Wimbledon mangthain a puanthuah a tel mai a ngai. Auger-Aliassime a tlak rual hian Bulgarian 18th seed Grigor Dimitrov pawhin hliam vangin first round a hmachhawn tluan thei lo bawk. Hetih lai hian Reilly Opelka chuan a khingpui Carlos Taberner lakah aces vawi 21 zet a neih chhawr tangkaiin hnehna a lo chang ve thung.