India chuan tun hnaia a ram chhunga drone thlawh luhtira beihna an tawh chu United Nations-ah a thlen.
Tar lan tawh angin Pathianni leh Thawhtanni khan Jammu-a Air Force Station leh sipai hmun dangah drone thlawh luhtir niin hei hi mi firfiakte chetnaah India chuan a ngai.
New Delhi chuan thil man tlawm leh hman awlsam, hmuh awlsam si chu firfiak pawlte hman remchan theih a nih thu a sawi a. Heng thil hi mi thuruk hriat nan te, puak thei inpek kual nan te, mi beihna atan pawh hman theih a nih avangin khawvel pum tan a hlauhawm niin a sawi.
UN hnena thu thlentu hi Home Ministry Special Secretary V.S.K. Kaumudi niin UN High Level Conference of the Head of Counter Terrorism Agencies of the Member States thutkhawmnaah a sawi.
Firfiakten hetiang hmanrua, ralthuama thuam belhchhaha an hmang tangkai chu thil ngaimawhawm, UN member ram dangte pawhin an ngaihven leh belhchian ngai a nih thu a sawi bawk.