Aizawl: MZP Headquarters Biate-in HSCL leh HSSLC 2022 result chhuaha zirlai ti tha chawimawina hun an hmang a. Congress Legislature Party leader Zodintluanga Ralte chu khuallian niin a hmanpui.
Thu sawiin Zodintluanga Ralte hian Biate hi citizenship petu a nih avangin a mikhual lo tih a sawi a. Zirlai ti tha chawimawi nachang hria an awm hi lawmawm a tih thu a sawiin, “Biate khua hian library in neih that vang nge ka hre lo a, in inkaihhruaina hi a tha em em mai a ni. Khawtlang hruaitutena khua in hruai dan leh inrelbawl danah entawntlak in ni ka ti a. Khawtlang in inrelbawl dan a fel a, khaw fai ber in ni reng ringawt pawh hi in fakawm takzet a ni,” a ti.
Zodintluanga Ralte chuan, “Mite entawn tlak, mite aia chungnung tak tak hi kawng hrang hrangah in chherchhuak a, Biate atang hian mi lar tak tak an lo chhuak thin, hei hi in inkaihhruaina tha, Mizo nun ze mawi tak in intuh vang a ni,” a ti bawk.
Inkhawm kaihruaitu, Lallungmuana, President MZP Hqrs Biate chuan khuallian atana Congress MLA Zodintluanga Ralte an sawi chhan sawiin, “MZP chu political party kan ni lo a, vawiina Pu Zodintluanga, MLA kan sawm chhan hi Biate tui lak Biate Water Supply Scheme min tihsaktu leh khaw fai kan nih avanga Rs. nuai 50 laia khaw chhung min chei mawisaktu a nih vang a ni,” a ti.